احلى ماخلق ربي (قصه سعوديه)روووعه

ريما:على ايش؟
ام ريما:بتصيرين ام يالغالية
ريما:صدق؟ الله يبارك فيكم
ابو نواف:واخيراً بصير جد..
ام نواف:كبرتينا ياريمـــــــا
نواف جاء لعندها:مبروك حبيبتي
ريما:اطلع برى تكفون ابعدوة عني
ام نواف:وش فيك ريما؟
ام ريما:هذا زوجك!!
ريما:ما أبيــــــة خلوه يروح عني..جلست تبكي ..نواف تضايق وعلى طول طلع من الغرفة..
ابو نواف:وش فيكم وش صاير؟
ريماتبكي...
ابو ريما:فيكم شي؟نواف سوى فيك شي؟
ريما:يبة انا مابي نواف تكفون ابعدوا عني ابي ارتااااااح
ام ريما:طيب خلونا نتركها ترتاح اللحين
جت النيرس واعطت ريما إبرة مهدئة..وبعدها نامت..!!
ابو ريما وابو نواف..راحوا لعند نواف في البيت..جلسوا معاه يبون يفهمون السالفة..
نواف:مافية سالفة..
ابو ريما:بنتي ماتسوي كذا الا اذا كان الموضوع كبير..
ابو نواف:تكلم نواف..
نواف:سوء تفاهم عادي بين أي رجال ومرتة..بس لاتكبرون السالفة انا راح اراضيها..
ابو ريما:اكيد شيء عادي.؟
نواف:ايه
ابو نواف:طيب وش الشيء الي خلاكم متهاوشين..وانتم سمن على عسل؟
نواف:يبة اعذرني انت وعمي هذي خصوصيات وماقدر اقولكم عنها وجيتكم على العين والراس بس لاتحرجوني انا ما راح اقول شيء..اذا ريما بتقول لكم كيفها11111 هذا شيء راجع لها..
ابو ريما:انا لله وانا اليه راجعون..

ريمـــــــــا طلعت من المستشفى..وراحت لعند بيت اهلها..الكل يطالع لخاطرها علشان ماتزعل..وأمها مافارقتها ولا لحظة..تأكلها وتشربها وتهتم فيها..كانت فرحانة ..حاولت تفهم السالفة من ريما بس ريما ماقالت ولا لشخص عن الموضوع..جت ندى والجدة هيا لبيت ام ريما علشان يتطمنون على سلامة ريما ويباركون لها.. ام ريما مسكت ندى وقالت لها عن الي صار بالمستشفى بين ريما ونواف.وطلبت منها تفهم السالفة من ريما..!!

ندى سكرت باب غرفة ريما..
ريما:الله يستر شكل تسكيرة الباب وراها سالفة كبيرة
ندى:عليك نور..ريما وش فيك على نواف؟
ريما:اكيد امي قالت لك
ندى:ماعليك مين الي قالي..المهم انتي ماتعودتي تخيبن عني شيء...فضفضي لي ريحي نفسك..
ريما:آآآآآآهـ ياندى ياليت..بس والله ما اقدر هذي خصوصيات وماقلت حتى لأمي وأبوي عنها
ندى:حتى انا؟
ريما:ندى انا ماأخبي عليك شيء..بس والله ما فيه شيء..يعني مشاكل تافهة تحصل بين أي زوجين
ندى:أكيد؟
ريما:أكيد...!!
ندى:نبي نخطب الهنوف لتركي
ريما:احلفي..
ندى:والله..اليوم امي كلمت عمتك نورة ..وقالت لها عن الموضوع..بعد ماتركي عصب يوم عرف ان الهنوف مخطوبة وحلف مايتزوج غيرها
ريما:والله وطلعت ياخالي العاشق الولهان
ندى:ههههههه شفتي كيف..!!ياما تحت السواهي دواهي
ريما:انا اقول وش فيها الهنوف ماكلمت تطمن علي..اكيد مستحية مني هههههههه
ندى:اكيد ههههههههههه
ريما قامت من سريرها
ندى:وين وين؟
ريما:بسم الله بروح اجيب مويا
ندى:لا حبيبتي انا اجيب لك انتي وحدة حامل ولازم تدلعين هاليومين..
ريما:ههههههه ياحظي
ندى:شفتي كيف ندلع بس مو علشانك علشان النونو الي في بطنك..
ريما:ههههههههههه

رن جوال ريما وكان نواف الي اتصل..على طول سكرت الجوال
ندى:نواف؟
ريما:ايه
ندى:انا قلبي يقول لي ان الموضوع كبير؟
ريما:لا كبير ولا شيء بس اكيد انا زعلانه علية تبيني اكلمة بالجوال
ندى:الله يعينه عليك..ما قلتي لي وش صار على بيتكم
ريما:الصراحة البيت جنان متكتك وروعة يعني التصميم والالوان والرخام كل متناسق
ندى:الله يعطيكم خيرة ويكفيكم شرة..
ريما:آمين..
ندى:تحبين نواف؟
ريما:مادري
ندى:معقولة
ريما:ايه معقولة ندى..نواف طعني والله طعني
ندى:ياقوي راسك..طيب تكلمي قولي شي
ريما:ما أقدر آهـ ياندى..

ريما:ياليت ان الزمان يرجع ورى والليالي تدور..
ويرجع وقتنا الأول ننعم في بساطتنا..

زمان اول احس انه زمان صادق فيه شعور..
نحب ونخلص النية وتجمعنا محبتنا..

زمان مافيه لاغيبة ولاحتى خيانة ونفاق وزور
ياليته بس يرجع ونسترتجع طفولتـــــنا

صغار وقلوبنا بيضاء..ونعيش بعالم محضور

ولانعرف ابد اغراب ما غير عيال حارتنا
صحيح صغار بالتفكير ولكن ما علينا قصور

نخطط نكسر اللعبة وتسعدنا شقاوتنا..
نروح للمدرسة بدري ونضحك داخل الطابور

نحاول نزعج العالم بروحتنا وجيتنا..
وعشان نأخر الحصة نخبي علبة الطبشور..

نشاغب بس بالأخر تميزنا براءتنا
نحب الضحك والهيصة
نحب انط فوق السور..

نفرفش ليه ما نفرفش ما دام الضحك عادتنا
ولكن دارت الأيام وبان الخافي المستور

وصار الهم متعلي على قمة سعادتنا
كبرنا وصارت الدنيا تصف احزاننا بالدور..

وتهدينا الالم والهم غصب عن عين رغبتنا
تعبنا من بلاوينا احد ضايق واحد مقهور..

وكلن غارق بهمه وفي الآخر تشتتنا
وانا ماقول غير الاياليت ان الزمان يدور..

ويرجع للورى فترة نعدل وضع عيشتنا..

: : :
نواف يفكر كيف يرضي ريما..يسترجع شريط ذكرياتة أول ماكلمة ابوهـ فيها يوم رفضة..ويوم راح يخطبها من عمة ويوم ملكتهم وأيام المكالمات بينهم ويوم زواجهم ويتذكر سفرتهم لإيطاليا...ريما ماقالت الكلام الكبير الا اكيد فيه شيء كيف تتهمني اني ما أحبها وأسيل وش دخلها بالموضوع!!انا ما عمري فكرت في أسيل..كل الي يربطني في أسيل انها بنت خالت أمي ودرست معاي ترم في أمريكا حتى في امريكا ماقد شفتها غير مرتين..ومع اصدقائي!!اكيد الموضوع فيه شيء..انا لازم افهم وش دخل ريما في أسيل!!

نواف كان يسمع اغنيــــة "فقدتك"

فقدتك..يا اعز الناس..
فقدت الحب والطيبــــة

وانا من لي في هالدنيا سواك ان طالت الغيبة

رحلت ومن بقى وياي يحس بضحكتي وبكاي وحتى الجرح
في بعدك يهلي بي واهلي بــــــــــــهـ

وانا من لي في هالدنيا سواك وان طالت الغيبــــــــة..

: : :

من بكــــــرى الكل كان مجتمع في إستراحة ام نواف اختها أم سعد وسلوى وتهاني وبناتهم..!!

ام نواف:ابشركم ريما حامل
ام سعد:ماشاء الله الف مبروك
تهاني:ما شاء الله واضح عليها امس التعب..تبركون
سلوى:الف مبروك والله يتمه ان شاء الله
ام نواف:الله يبارك فيكم
سجى:مبروك خالتي
سما:الف مبروك يالله احس ريما شكلها صغير
ام نواف:الله يبارك فيكم..ايه ريومة شكلها صغير وبتصير ام ان شاء الله
أسيل من غير نفس:مبروك
ام نواف:الله يبارك بعمرك عقبال مانفرح فيك
أسيل(وين تفرحون فيني وهذي خطفت فرحت عمري "نواف")

_________________________________

سما:خالتي وينها ريما ليش ماجت وياكم؟
ام نواف:تعبانة في بيت اهلها
سجى:عسى ما شر..
ام نواف:اكيد من الحمل
سجى:الله يعينها
سما:سجى تعالي شوي ابيك برى..
سجى:طيب..

طلعوا برى مجلس الحريم..
سما:اتوقع صارت مشكلة بين ريما ونواف امس وتشوفين
سجى:لا اكيد اللحين هم فرحانين بحمل ريما
سما:طيب ليش عند اهلها؟
سجى:أيه صح!!
سما:اكيد المشكلة كلها من أسيل
سجى:ياربي البنت هذي كأنها هي المراهقة مو أنا
سما:اسمعي انا بروح اسحب جوال أسيل وبحاول اخذ رقم نواف منها اكيد مخزنتة..وابي اسحب الصور منها بدون ماتحس..ونتصل على نواف انا وانتي ونفهمة قبل لا توقع الفاس في الراس..
سجى:زين سويتي...

: : :
نواف ما غمضت عينة حس بفراغ كبير بعد ريما..ليش سويتي كذا ياريما !!والله احبك ولا لي غنى عن حبك..انا لازم اروح لها وتفهمني السالفة ..راح وبدل ملابسة وركب سيارتة..وأول ماشغل سيارتة..رن جوالة كان رقم غريب..(رقم سما) رد نواف..
نواف:نعم؟
سما:كيفك نواف؟معاك سما بنت تهاني
نواف:ايه هلا بك سما
سما:مبروك الي سمعناهـ
نواف:الله يبارك في عمرك...
سما:نواف ممكن اتكلم معاك بموضوع انت اللحين مشغول
نواف:لا تفضلي انا أسمعك
سما:ريما زعلانة منك؟
نواف:نعم؟وش عرفك انتي؟
سما:انا اعرف السالفة كلها
نواف:الحقيني بها..ريحني الله يريحك
سما:ريما انسانة طيبة بعكس أسيل مع ان أسيل بنت خالتي بس الحق ما ينزعل منه وحتى سجى اخت أسيل تشهد على كذا..أسيل تحاول تغلط على ريما اوهمتها انك تحبها وكنت ناوي ترتبط فيها من قبل وفبركت صور لك ولها الي يشوف الصور يعتقد ان كانت تربطكم علاقة مع بعض..ريما انصدمت اول ماشافت الصور وراحت تبكي واتصلت عليك..وبعدين يوم جيت بتاخذها أسيل كانت واقفة معاك تضحك معاك علشان تغيظ ريما ريما طلعت وشافتكم تضحكون ويا بعض وصدقت الي سمعتة...
نواف:طيب انتم ليش ماسوتي شيء انت وسجى؟
سما:يانواف احنا ماعرفنا الا متأخرين بالسالفة..تكفى حل الموضوع لا تخسر ريما ترى ريما ماتعوض انسانة راقية وحساسة..انتبة لها..
نواف:وش تستفيد أسيل من الي سوتة؟
سما:ولا شيء غير انها تخرب بينكم..
نواف:سما ممكن طلب؟
سما:اذا قدرت راح انفذة لك اكيد
نواف:انتي اذا نفذتي الطلب الي ابية انتي وسجى راح تحلون المشكلة الي بيني وبين ريما
سما:اوكي وش الطلب؟
نواف:انا بتصل على امك وابي اطلبها تجين انتي وسجى معاي لعند ريما كنك تبغين تزورينها انتي وسجى و أسيل
سما:بس أسيل ماراح تروح
نواف:احسن هذا المطلوب بس نقول قدامهم..وبكذا راح تقولون لريما عن السالفة لاني لو راح اقولها السالفة لحالي ماراح تصدق اعرفها زوجتي..
سما:اوكي انت اتصل عليهم على بال ما نجهز انا وسجى
نواف:الله يوفقكم انتي وسجى والله مو عارف كيف ارد الجميل
سما:مافية جميل بين عيال الخالة..يالله انت بسرعة لانتأخر على ريومة
نواف:طيب سلام
وهو في سيارتة جلس يطالع العقد الي ركبتة ريما في المرآية يوم يروحون للمزرعة
كانت تقول.. شوف حبيبي انا ابيك تتذكرني دايماً مابي اغيب عن بالك ولا ثانية..
هذا العقد ابي احطه لك في السيارة..
نواف:بس انتي معاي مو بس في كل لحظة الا في كل ثانية..انتي ما فارقتي ولا راح تفارقين خيالي..انتي معاي في كل مكان في عقلي وقلبي وروحي
ريما:فديت قلبك يالغالي..
نواف:والقسم الثاني من القلب وينه؟
ريما: انا راح البسة..هذا قلبي مقسوم قسمين قلب معاك وقلب معاي..والله لايجيب الفراق بيني وبينك
نواف:آمين

نواف..وينك ياريما وين كلامك..!!

: : :

نواف ماحس بنفسة الا ويرسل مسج لريما..يقول فيه.

عيبــــــــك الطيبة إليا قالوا لك تصدق
ماتــــفكر في الكـلام ومن يقولة
وصلوا لــــك حكي يبغــــونة يفــــرق
وانت طبعك تأخذ الأمر بسهولة

ريما ما فهمت وش يقصد نواف..!!

جاء نواف واخذ سما وسجى وطبعاً اسيل رفضت تروح واحتجت انها مالبست زين..حتى الحلوين الصغيرين حلا ويزن راحوا معاهم يحبون ريما بالحيل..لان ريما تبادلهم نفس الشعور وتحب الاطفال بوجهة عام..

اتصل نواف على ريما ماردت عليه..طلب جوال سما علشان يتصل عليها..طلع عندها رقم غريب..ردت على طول
نواف:هلا ريموتي
ريما جت بتكسر الخط
نواف:استنتى دقيقة بس..انا اللحين جاي لكم ومعاي ضيوف لازم تستقبلينا اوكي!!يالله سلام

ريما{ياربي منهم الضيوف..وكيف استقبلهم وانا زعلانة عليه..!!**
جت الخدمة لريما وقالت لها ان نواف جاء ومعاهـ بنات وبزارين..ريما ما استوعبت الموضوع
ريما لبست جلابية لونها أسود ناعمة بالحيل ولفت شعرها ونزلت تحت بالصالة

نواف راح عندها:الحمد لله على السلامة..
ريما بكل برود:الله يسلمك!!
ريما:هلا ومرحبا بسما وسجى منورات والله
سجى:هلا بك اكثر مبروك ريما
ريما:الله يبارك فيك
سما:مبروم ريما انتي ونواف
ريما:الله يبارك بعمرك..هلا بالحلوة حلا تعالي اعطيني بوسة..وانت حبيبي يزن كيفك قلبووو!!
نواف كان تشب نار في قلبة من القهر..من تطنيشها له..
نواف:انا بروح وأرجع اذا خلصتوا كلامكم اتصلوا علي
نواف طلع من بيتهم وكان معصب من حركات ريما له..مو متعود عليها كذا متعود على حنانها وطيب قلبها..
سما:ريما انا وسجى جينا عندك علشان نوضح لك الحقيقة انتي ظلمتي نواف..ترى اسيل ميتة على نواف تموت علية..بس هو ما يعطيها وجهة وكانت مقهورة يوم زواجكم لدرجة انها ماحضرت للعرس..والصورة الي شفتيها ترى كلها كذب×كذب
ريما ساكتة وكانت تسمع لكلام سما
سجى:ايه ياريما مع ان أسيل اختي بس الله يهداها فشلتنا ..ترى الصورة الي شفتيها مفبركة عندها صديقة تعرف بالكمبيوتر والحركات هذي وفبركة الصور..لاتصدقين انتي اللحين خلاص صرتي مرتبطة بنواف اكثر من قبل حرام تضيعين نواف من يديك ترى نواف يحبك وكان مقهور علشانك لاتصدقين أي كلام ينقال لكم يبي يفرق..تدرين ان أسيل ونواف مادرسوا مع بعض غير ترم واحد وتردين انه ماقبالها غير مرة او مرتين بالكثير
سما:واذا قابلها قابلها ومعه اصدقائة يعني مو لحالهم مثل ماكنتِ تعتقدين..ابعدي الأوهام عن راسك واطرديها..
ريما:مشكورات حبيباتي والله ريحتوني الله يريحكم كشفتوا لي أشياء ماكنت اعرفها فهمتوني اشياء كنت بموت على ما أفهمها ..طيب ممكن سؤال
البنات:تفضلي..
ريما:انتم ليش تقولون الكلام هذا مع انكم من المفترض توقفون مع أسيل
سما:صحيح أسيل مثل اختي..بس من يوم رجعت من أمريكا تغيرت صارت انسانة ثانية..ماتحبنا مثل أول ودايماً سيئة الظن فينا..
سجى:واحنا مانسكت عن الغلط..لازم نوضح الحقيقة اذا كان بمقدورنا..
ريما:مشكورات والله يجزاكم كل خير على وقفتكم معاي..وماراح انسى لكم الجميل..
سجى:ماسوينا الا الواجب...
سما:لا تشكرينا ولا شيء..تستاهلين اكثر انتي ونواف...
سما:انا بتصل على نواف علشان يجي يرجعنا لأهلنا وابي اقولة ان ريما تبيك ترجع لها وتتفاهمون على كل شيء..
ريما:ايه اذا ما عليك أمر..

نواف جاء ورجع البنات للاستراحة وبعدين رجع وهو طاير باقصى سرعة لبيت عمة فهد علشان يقابل ريمــــــا

نواف:ريما انا صحيح كنت بعيد عنك الفترة هذي وكنت دايماً مشغول البال..واللحين جاء الوقت الي لازم اقولك عن المضوع الي مشغلني ..
ريما:تفضل تكلم..
نواف:بعد ما راح محمد بيت ابوي صار فاضي واللحين بيتزوج وما راح يرجع الا بعد 8 سنين ..والفترة هذي مين راج يجلس عند أمي وابوي يراعي لهم مافية غيري انا لاني ولدهم الوحيد وما ارضها اطلع برى البيت واهلي محتاجين لي..لو يمرض ابوي فجأة لا سمح ال وانتي تعرفين ان فيه مرض القلب وانا بعيد عنه
ريما:بسم الله عليه..نواف وضح اكثر
نواف:انا كنت افكر نبيع البيت الي لنا ونعيش مع أمي وأبوي لانهم با أمس الحاجة لنا و ما أقدر اتخلى عنهم حتى محمد قبل لا يسافر وصاني فيهم..بس قلت احرمك فرحتك كنتي فرحانة باليت حيل وماحبيت اخربها عليك والصراحة انا بين نارين نار امي وابوي ونار ريما..يعيني كل واحد ودة يستقل في بيت لحالة واكيد انتي تتمنين يكون لك مملكة خاصة فيك..بس الظروف..وكل يوم كنت متردد كيف افاتحك بالموضوع..!!
ريما:خلصت كلامك؟
نواف:ايه
ريما:اللحين هذا الي شاغل بالك عني طول الاسابيع الي مضت..نواف انا كنت راح اقولك هذا الاقتراح اننا نبيع البيت لان صعبة نترك عمي وخالتي لحالهم بعد ماتعودوا علينا واحنا تعودنا عليهم..يعني ماتخيلي نفسي اذا رحت للدوام بجلس لحالي الضحى تعودت على الجلسة مع خالتي..وبعدين عمي مايصبر عنك ومستحيل يانواف افكر بالتفكير هذا مو انا الي افرق بين الولد و أهله واهلك هم أهلي صعبة اتخلى عن أمي و أبوي..
نواف:أصيلة ياريمـــــا والله ان عمي عرف يربي..وسعتي صدري يالغالية ودايماً تفاجئيني بكلامك الموزون وعقلك الكبير عساني مانحرم منك..!!يالله عاد شلون ولدي
ريما:طيب لو كانت بنت؟
نواف:بنت ولد الي من الله حياهـ الله..
ريما:اشوى احسبك من المعقدين الي لازم ولد
نواف:اتمنى انا لو تجيني بنوتة تصير ربع جمال امها
ريما:ياحياتي والله..
نواف:يالله روحي قولي للخدامات ينزلون شنطتك لان البيت مايحلى بدونك..
ريما:يالله دقايق ارتبها واجيب عباتي واجيك..
نواف:اوكي انتظرك

رجعت ريما لبيتها..والكل فرحان ومبسوط علشان رجعتها ..
: : :
رجعوا تهاني وسلوى وعيالهم للكويت بعد ماجلسوا اسبوعين..!!

بعد أسبوع وافقت الهنوف على تركي..وصارت خطبه رسمية وملكة..وبعد مايخلصون دراستهم يتزوجون..!!

: : :
مرت الشهور بســــــرعة ودخلت ريما بالشهر الثامن..!!
ريما:حبيبي نواف تكفى لاتتركني اذ ولدت ابي اشوفك جنبي..
نواف:لا تخافين يالغالية اذا الله مد لي بعمر ماراح افارقك ولا لحظة وخصوصاً وقت ولادتك..لانك بتكونين بأمس الحاجة لي..
ريما:عساني مانحرم من عطفك وحنانك يالغالي..اذا ولد وش بتسمية؟
نواف:مدري في بالي أسماء كثيرة بس يمكن سعود على أبوي
ريما:واذا هي بنت
نواف:انتي تسمينها..وش يعجبك اسم؟
ريما:شمــــوخ..أو يارا
نواف:الي يعجبك يالغالية...يالله انا بروح اجيب لك صحن فواكة لازم تغذين النونو ابية يطلع شبعان
ريما:هههههههه الله يقطع ابلسيك..
نواف:حبيبتي محمد اليوم اتصل علي ولزم علي اني ازورة
ريما:بتروح لكندا؟
نواف:ايه انا وانتي..والله مشتاق لأخوي بالحيل..وابي ارفع معنوياته قبل الاختبارات..
ريما:اكيد اخوك محتاج لك وانت مشتاقة له بس انا وش دخلني بينكم؟لا ياقلبي انت روح وانبسط مع أخوك..وانا تعرف الحمل تعبني وما أقدر اروح واجي مثل أول
نواف:بس ما اقدر اصبر عنك..ولا تدرين خلاص راح اكنسل الرحلة
ريما:لا يالغالي ترى بزعل منك لازم تروح وانا راح اجلس عند أمي و أبوي..مافية خوف علي ان شاء الله
نواف:اكيد
ريما:اكيدين
نواف:تسلمين لي يالغالية لازم تحلين لي مشاكلي..
ريما:ان ماحليتها لك مين يحلها يابعد قلبي؟

: :

سافر نواف لعند محمد..واستقبلة محمد وكان مبسوط فيه..وماترك مكان في كندا ماخلاه يشوفه وريما راحت لبيت امها وابوها وجلست عندهم...طبعاً نواف كل شوي يتصل ويتطمن عليها...

ريما في الليل صحت من النوم الساعة 3 الفجر حست بعوار خافت راحت تنادي امها..
ريما:يمة ما اقدر استحمل بطني يعورني آي آي
ام ريما:يمكن قربت ولادتك
ريما:لا يمة ما بعد دخلت الشهر التاسع
ام ريما:عادي اذا دخل الشهر السابع توقعي ولادتك بأي لحظة
ريما:اااااااااي يمة خلاص بموت
ام ريما:بسم الله عليك..يالله خلينا نروح للمستشفى..
ريما:ما اقدر اقوم احس بناااار في بطني ااااااي
ام ريما:عادي يايمة كل وحدة بتولد لازم تتعب تحملي شوي
ريما:اتصلي على نواف آآآآآه
ام ريما:وش دخل نواف..اللحين هو مسافر
ريما:مانيب رايحة الا لمن تتصلين علية
ام ريما:حرام عليك نخوف الولد وهو موب موجود عندنا
ريما:اتصلي علية تكفين علشاني
ام ريما:طيب

ام ريما اتصلت على نواف وقالت له السالفة نواف ارتبك وحس بخوف اول مرة يخاف بالشكل هذا ام نواف ما خوفتة كثير بس قالت يمكن تولد ريما..محمد يهدية ونواف مشغول بالة بريما..قرر انة يرجع للسعودية على اقرب طيارة طبعاً مافية حجز دايرتك راح من دولة لدولة ومن مطار لمطار علشانة وعد ريما يكون جنبها اذا جت تولد..

ريما قبل ما تدخل غرفة العمليات جلست 6ساعات...الكل ينتظر برى امها وأبوها وندى وام نواف ونواف كل شوي يتصل عليهم ويتطمن عليهااااا

ريما قبل ماتدخل لغرفة العمليات
ريما:ماجاء نواف؟
ام نواف:هو اللحين بالطيارة يبي يجي
ريما:ابي اشوفة اخاف اموت
ابو ريما:لاتقول هالكلام وانا أبوك بسم الله عليك
ام ريما:لا تخافين كلنا مرينا بالي انتي مريتي فية..توكلي على ربك
ندى:نواف ياريوم راح يجي تشوفين..

اول مادخلت غرفة العمليات نواف جـــــــاء بسرعة وهو يركض من ممر لممر في المستشفى على طول من المطار الى المستشفى..دخلت ريما الغرفة ونواف على طول صل

نواف:وينها11111؟
ابو ريما:نواف ريما دخلت قبل شوي لغرفة العمليات
نواف:ابي اشوفها
ام نواف:ماتقدر ياولدي
نواف:اقولكم بدخل مرتي ماشفتها
ام ريما:هدي بالك ياولدي اللحين ان شاء الله راح يطلعون ويبشروننا
ندى:نواف انت توك جاي من السفر ارتاح
نواف:وين الراحة وريما في غرفة العمليات
ابو ريما:لاتكبر الموضوع وانا عمك..
نواف ما قدر يجلس يروح ورجع عند باب العمليات..طلعت النيرس
النيرس:المريضة بحاجة الى دم!!
نواف:وش فيها
النيرس:تعبانة اللحين بس لازم تبرع بالدم
ابوريما:كلنا راحة نتبرع

ابو ريما ونواف تبرعوا لهالان فصيلتهم وحدة...!!وساعدوا ريما
نواف:طولت صح؟
ام ريما:الله يقومها بالسلامة..يمة بنتي تاخرت
ندى:اكيد ياسلمى تبي تاخر هي تولد
الكل مرتبك طولت بالحيل وهي في غرفة العمليات..!!

طلع الدكتور عليهم
الدكتور:مبروك إيجا لكم صبي!!
نواف:واللحين ريما شلونها؟
الدكتور:لا الحمد لله انقذنها بالدم ولله الحمد هي بخير بس بحاجة الى راحة
نواف:الحمد لله والشكر
ابو ريما:مبروك
ام ريما تبكي
ام نواف:هذ وقت دموع؟ الف مبروك يايمة
ندى:الف الف مبروك يتربى بعزكم
نواف:الله يبارك فيكم..!!
نواف:دكتور ممكن ادخل لها
الدكتور:لا هي تحت تأثير البنج وبكرى يالليل تعالوا لها
ام ريما:بس بالليل ما كأننا متأخرين ليش مو العصر البنت فيها شيْ؟
الدكتور:لا تطمني مافيها شيء بس المدام ماراح تصحى الا ع الساعة 6 المغرب والله اعلم..!!
ابو ريما:ان شاء الله
الكل راح نواف ماسكت جوالة من الناس الكل يبارك له..

______________________________________

ام ريما:بس بالليل ما كأننا متأخرين ليش مو العصر البنت فيها شيْ؟
الدكتور:لا تطمني مافيها شيء بس المدام ماراح تصحى الا ع الساعة 6 المغرب والله اعلم..!!
ابو ريما:ان شاء الله
الكل راح نواف ماسكت جوالة من الناس الكل يبارك له..

نواف ملئ الجناح حق غرفتها ورد جوري علشان ترتاح وهي تحب الجوري..نواف جاء الساعة 4 وجلس ساعتين وبعدين صحت من البنج واول ماصحت
نواف:الحمد لله على السلامة..
ريما ابتسمت له:الله يسلمك
ريما بكل تعب:متى جيت؟وانا في غرفة العمليات ادعي انك ترجع لي
نواف:وهذا انا جيت...شفتي الصغير
ريما:لا مين يشبة؟
نواف:يشبة لك
ريما:لا انا ابية يشبة لك
نواف:خلاص بيني وبينك يعني ولدي وولدك
ريما:وش تبي تسمية؟
نواف:والله محتار بس بكرى راح اقولك وش جاء في بالي
نواف:يالله ارتاحي ولا كلمة
ريما:ههههههه

الكل جاء يبارك لريما ونواف امها وابوها وجدتها وندى وتركي وعمتها نورة وام نواف وابو نواف وعمها طلال وزوجتة وخالة نواف فوزية

نواف سوى عشاء كبير لزملائة واصدقائة وجمع الشباب كلهم بمناسبة المولود واكيد علشان الهلال فاز...
وفي نفس اليوم الي ولدت فية ريما فاز الهــــــلال والي سجل الهدف الذيب ســــــامي الجابر..

نواف قرر يسمي الولد سامــــي!!الكل اعبجة الاسم

سامي بن نواف بن سعود<كشخة!!"

ندى بعد ماتخرج ماجد تزوجها وسافروا برى علشان يكمل دراستة...!!وكانوا سعيدين ومرتاحين في حياتهم..ومتفاهمين

تركي ملك على الهنوف..واتفقوا على الزواج بعد مايخلصون دراستهم..

نوف نجحت في الثانوية العامة وجابت 95% ..وكذلك محمد نجح وبعدين رجع للرياض وسووا حفلة زواج كبيــــــرة وسافروا شهر عسل للأسبانيا وبعدين رجعوا لكندا علشان نوف تسجل في الجامعة حقت محمد لأنهم راح يدرسون سوى..

فيصل دخل عالم التجارة وحب يكون له ثروة قبل مايتزوج..ويصير بزنس مان..

عبد الرحمن واصل وكمل دراستة .....!!
النهـــــــــــــــــــــاية

اتمنـــى انـها ناالت اعجااابــكم

مــــــــع تحيـااااتـــــــي

*قمرهم كلهم*

فدييييييييييييتج قموووورة حبيبتي
الحمدلله على النهاية السعيدة
ومشكووورة على طرحج هالقصص الروووعة
احلى ماخلق ربي (قصه سعوديه)روووعه - صفحة 5 387403

يعطييج العافيه ياقمرنـــــــا احلى ماخلق ربي (قصه سعوديه)روووعه - صفحة 5 387403

فدييتج بعد عمررري ع تواااجد ومتااااابعتـك المستمــره

معاااااااااي

وانشاءلله بنززل اليوووم رواايه جديــده

احلى ماخلق ربي (قصه سعوديه)روووعه - صفحة 5 760256

احلى ماخلق ربي (قصه سعوديه)روووعه - صفحة 5 760256