قصه حب لبطل خطير بيزا وريم ههههههههههــ

سلاااااااااام عليكم كيف حالكم طيبين بما اني جديد فحبيت اجيبلكم قصه بدل قصص الحزن الي نهيتها بكا وانا ما احب القصص الحزينه وكمان المسلسلات جبتها من احد اخوياي بعد ماكنت اطلبه فيها شهرين وارسلها لي بعد طلاع الروح القصه قديمه شوي بس تموووووت من الضحك هههههــ وان شاء الله تعجبكم

تنبيه مهم

للوصول لآخر حد من الإستمتاع أثناء القراءه أنصحك بالآتي2عصير الربيع ذا حقالبرتقان(يفضل) مخده أي وساده علشان رقبتك ما تتعب و علبة زبادي لا يطقك الجوع وانتتقرا او شيبس تسالي ان وجد في البقاله ما انصح احد يدخن او يشيشه وهو يقرا القصه عشان لايختنق من الضحك

حكاية بطلنا (((بيزا )))

&&&&&&&&&&&&&&&&&&&&&&&&&&&&&&&&&

القصه من ذكرياتي الجميله ( أمحق جمال فيها )

كان عمري 18 سنه( أول مره أشوف واحد عمره 18 ) يوم توني بزر قبل لا يخط الشنب

( شنبي ما خط إلا مصيف ما بغى يطلع )وكأي شاب في ذلك العمر الخشم منتفخ على مصراعيه تقل شكامين جمس

و حبوب الشباب

لاعبة في الوجه صح والجسم ما تدري وش يبي ! اليد اليمنى اطول من اليسرا والركب كلها

يمين جاية !!

والنفس يا كافي مرتزة على راس الخشم تبي من يحارشها وتقب !! والطفره على اصولها البوك ما به الا

ام عشيش وربع ريال منعفط !! و بكت الدخان تشتريه بالدين من البقاله بعد حلوف وايمان انك

بتسددله وصفقني ان تساني قد وفيت بوعدي ويقعد البكت عندك حول العشرة ايام وانت تمزز منة والزقاره

يا حول يبست وتكسرت ومع ذلك وش زين طعمها (( ما أقدر أبطله قال!! )) وكان عمرها هي 16( عز الطلب

واسأل مقلع ولا تسأل طبيب) كانت بنت جيراننا وكانو عيال نعمه من جد يعني مطخطخين بقوه

وحنا ساكنينA

جنبهم على بال أمنا إننا زيهم عيال نعمه نبي نحتك وحنا الأرض حقت بيتنا كانت منحه

من الدوله كان

بيتهم كبير ويعتبر قصر ذاك الوقت قبو ومسبح ( من أول كانت نظرتنا للناس اللي عندهم مسبح

في بيتهم إنهم ناس متفتحين خخخ أبوك يا زمن ) وعندهم سواق وهذه كانت كارثه بحد ذاته

(لاتفوتكم بحد ذاته بس)

كان الوالد مانع الأهل من زيارتهم علشان ما يخربون طبايعنا

( تعرفون حنا فرنسيين ولنا طبع خاص )

بس يقول كلموهم بالتيليفون ولا تروحون لمهم مع العلم إنهم ناس طيبين مره وبناتهم حلوااااات

مرررره

أمهم كانت فيها مسحه قرويه(يعني لها جايل) وتحب المسايير على الجيران بس بناتها كانن دلوعات

والوحده رافعة خشمه للسماء وكانن ثلاث

بس أنا ما حبيت إلا وحده قسم بالله!

جت زارتنا أمهم مره مغربيه وجت معها وفاء وريم بناتها جايات لقافه بس ويمكن الفراغ لعب دور في

جيتهن وسيم زمانه اللي هو أنا أيام عز المراهقه والخبال(يقالك عقلت اللحين) كنت في غرفتي

أيام الأتاري اللي باشرطه وخذ يالعب

كانت غرفتي عباره عن كارثه ما كنت أعترف بالمعاليق ولا الدولايب

الثياب مجدعه والسراويل معلقه على الستارة وزي كل المراهقين لي جوي الخاص ما أحب أختلط مع أحد من أهلي يعاملوني على أني بزر

وانا أشوف نفسي أطلق شنب!المراد نزلت زي العاده أهيجن تقل مهبول والأهل كانوا متعودين على هبالي وملو من الحتسي وعن قولة

ورا ماتركد وتصير زي إخوانك عاقلين وينزلون مع الدرج موب مع الدرابزين(أصنصير القراوه)!!

(ولي قصه مع الدرابزين حق الدرج كنا في زيارة خالي(خالي يعني أخو زوج مرة عم أبوي من الرضاع) وكان توه نازل في بيت جديد وكنا مجتمعين أنا ومبزرته نلعب في الصاله بعد ماشاتنا خالي بوز علشان كنا نلعب كوره في السيب وكسرنا اللمبه ناظرت لدرابزينهم ولاوه يلصف جديد قلت ياولد خذلك لفه عليه وارقى للدور الثاني واجيك كني طرزان متعلق على الدرابزين وكان وضعي سليم ميه ميه ومسرع ومحافظ

على توازني بحكم خبرتي بس اللي ما عملت حسابه هو إن درابزبن بيتنا نهايته مافيه شي يوقفك إذا وصلت تطيح على الأرض بس بيت خالي كان في نهاية درابزينهم شي زي الكوره الحمد لله

جت سليمه بس قوعي

إنكسر وطبعاً صعب يجبس علشان كذا جلست على السرير لفتره لاعادها الله من هوايه

المشكله الكوره الخشبيه اللي بآخر الدرابزين لين اللحين مفقوده مالقوها!!

وين راحت تهقون؟

وين..كنت أية نزله أهيجن من غرفتي وانا أتزحلق والا والله أسمع أمي تقول لي"بيزا هووو

عسى مانهبلت ياوليدي؟

ياحبك للمزح يا وليدي إنزل الله يصلحك لا تطيح ويجيك شي

أنا كنت معطيها ظهري لأني متشعمط في الدرابزين بس إستغربت هالأسلوب التربوي!!

وش السالفه؟وانا اللي أنقز من الدرابزين في حركه سينمائيه مستغل إني معصقل وأيضاً الحريه المطلقه التي يمنحك إياها سروال السنه خصوصا إذا كان فيه شق في الركبه هذا عز الطلب ووقفت بعد وثبه عاليه على رجليني الممشقه

وصوت النشقه يسمعه اللي بآخر الشارع والتفت على أمي وكانت بوسط الصاله واقفه وحسيت وانا مركز نظري على أمي إن فيه ناس ثانين حولها وبسرعه إلتفت أشوف من اللي حولها والكذب خيبه ترا مع سرعة إلتفاتي طشرت بعض السعابيل من إثمي اللي أربع وعشرين ساعه مفتوح وزياده بعد ضرسيني اللي في

الواجهه كانن طايحات ذيك الأيام""الله على الشكل"" المراد أول وحده شفتها أم جيراننا طنشتها

وش عاد عجوز مهيب متشرهة علي!

ثاني شخص عيني شافته وفاء الكبيره كانت بعمري بس يفرق بينا العقل برضوا طناش ماهمتني

لاهي ولا

النفر اللي بوجها! والا خشمها اللي تقل غطى فقس!! خشمها ماخذ نص وجها الله يعافيها ولا يبتلينا بس

(ترفق أنت وخشمك سلة السيف)

ثالث بيرسون شفته(بيرسون يعني جدار للمعلوميه) كانت ريم لابسه ذيك التنوره الحمرا وبلوزه زيتيه وبروش برتقالي(فاتنة فرزاتشي هالتشكيله)!!يا الله بدون شعور(هو أنت عندك شعور من الأساس؟ قمت أطالعها وماطنشتها زي الباقين

أخذت نفس عميق وانا أطالعها ونظراً لأن الخشم كان مليان بلاوي فا النفس العميق أدا إلى أني أبلع شي مدري شو ومدري من وين جى أصلاً بس كان طعمه حلو(وعععععع) جلست 4 ثواني وعشرين جزء من الثانيه بالظبط مبحلق فيها وهي كانت راسمه إبتسامه حلووووه على شفايفها والعيون خطر ماتاكلني!! وما خلا البحلقه تنفك إلا شي غريب كان جاي لم وجهي كان يطير ومن سرعته تسمع له صوت في الهواء!! قلت وش ذا ياربي!! لايكون هذا سهم كيوبيد حق الحب اللي يقولون وجاين يبي يخفس قلبي وادخل عالم الحب؟ وبعد أقل من ثانيه تبينت وعرفت وش ذا اللي يطير وجاين لمي طلعت ذيك الزبيريه اللي جت مجاوبة على جبهتي من أمي ومعها مسج مفاده "عمى يعميك ألف مره قايلة لك لاتتعودها وبعدين تنحنح إذا بغيت تنزل ثاني مره فيه حريم" ياربي ذي أمي؟ وش قصة تنحنح ذي

بعد؟

الحريم كانوا مايتغطون عني أبد لأني بنظرهم نص ونص يعني مامن عقل! وانا كنت مبسوط طبعاً هو أحد لاقي يقز ببلاش ذيك الأيام؟ مع إن ذيك الأيام كان لبس البنات كله حشمه وستر الفاصخه منهن كانت تلبس تنوره ضيقه!!مهوب زي هالأيام اللي ماشاء الله تبارك الله المفضوح أكثر من المستور"منقهر ودي أرجع بزر مره ثانيه في هالوقت علشان أقز صح" المراد قلت في نفسي طيب وش ذا الأسلوب اللي عند أمي اليوم والا يعنني بتسوي فيها عندهم إننا عيال نعمه ونعرف نربي عيالنا ونعاملهم صح(عاد بالزبيريه) حسيت بمقصد أمي ودريت إني فشلتها فحبيت أصلح الخطأ وما أفشلها عند الحريم ورديت عليها بكل نعومه أنا آسف ماما(لاحظوا مهوب يمه) بس الأصنصير خربان وانا كنت

مستعجل فقلت أركب الهايوي أحسن(خوش تصريفه)!!

وكملت المسرحيه بقولة ماما وين بنطرون الرياضه حقي الأخظر أبو خطين بيض على جنب مالقيته في الدالوب(على بالي كاشخ ببنطرون المعارف)!!

قامت تضحك الوالده وأم الجيران ووفاء أم النفر إلا ريم كانت ساكته!! كانت تحاول أنها تستغل

كل لحظه بأنها تشبع من شوفة ملامحي (الللللله ونااااسه صدقت أنا) كانت نظراتها غريبه وما عمر (أو قط بالعاميه) أحد ناظرني زيها قبل ! حسيت برجفه بجسمي بسبت نظراتها وكانت واضحه رجفتي لأني لابس فنيلة علاقي لونها مايل للصفار( زي العاده )!! كانت هي في جو ثاني وحسيت

بهالشي فقلت خليني أبين لها إني زيها بعد وانا اللي أمعط سروالي إلى أعلى لأنه كان على وشك الصقوط تخبرون الربدزه الله بالخير من كثر الغسل واقعد أرفع يديني لفوق مستغل لبسي للفنيله العلاقي اللي صرت ألبسها دايم أول مابلغت علشان الناس يعرفون أنه طلع لي شعر وصرت رجال!!

وسبرت عيوني وانا اللي أسبر واسبر أسبر وجاني النوم وانا اسبر أثري كنت مغمض الله لا يقردنا على بالي كذا الغزلنجيه يسوون بعيونهم لأني كنت دايم أشوفهم يسوون بعيونهم كذا في السوق! وفجأة صرخوا الحريم هووو رجال

ياخزياه وين شيالنا بس!! ياربي واقف ساعه قدامكم توكم تحسون إني رجال؟ وش ذا إلى هالدرجه أشباهي أشباه بنت!! وراحوا يركظون ودخلوا غرفة الحريم ماصدقت أنا عاد! قلت أكيد ريم بتترك شي في الصاله علشان يكون عذر لها إنها ترجع وتشوفوني مره ثانيه (ماخذ مقلب في نفسي) أدور شي طايح خاتم إسواره خمخمه رشرش شلحه (لا وش دخل الشلحه اللحين بعد ماهو من الأساس الشلحه دايم تويق من

تحت التنوره ياحسره)

مامن شي ياولد وش السوات؟ يعني هذي ريم اللي أمي كانت تقص لنا عنها

وعن جمالها!! هذي ريم اللي فيها حبة خال في إصبع رجلها اليسرا!! هذي ريم اللي عندها تلفزيون لها في غرفتها ومحد يقدر يقول لها شي من اخوانها (زمن وولى) هذي ريم اللي إذا عطشت تشرب مويه زينا؟ هذي ريم إذا جت تكد شعرها تجلس أسبوع كامل تكده من طوله!يااااه والله ياهي دلع بعد طيب يابو البزابز وش السوات البنت تعلقت فيك والله حرام أعذبها معي!! فكرت أسرق نعلتها واخليها عندي للذكرى(أمحق ذكرى) أو ميداليه لمفاتيحي بدل السلسله! قلت مابدهاش خربانه خربانه لازم

أشوفها مره ثانيه وانقزللسيب حق بيتنا وزي الفيل طرت في الهوى وانا أقول(دووووووووك فليييييد!!قرنديزر) وكل هالصيحه ماهي إلا إستعداد لركوب فرسي في ذلك الوقت سيكل 24 أحمر وبدون رفارف والنسافه تسحب ورا ومكتوب عليها بالبخاخ"مسموح في زلتك ياقرة العين" وانا اللي أرفع الغزاله علشان أعطي عزم للسيكل ولكن كالعاده جيت مصلفط على قفاي وطلع صعرور وصف من زملائه الصعارير على راسي واركب السيكل مره ثانيه وادوس وانصى دريشة غرفة الحريم (تخبرون كنا ساكنين في قصر واسيابنا كبيره لازم أركب السيكل أمحق) وكانت الدرايش ذيك الأيام أيام الدرايش العاكس أول ماطلعت وحنا كاشخين فيها وجيت طاير بالسيكل ويوم وصلت لدريشة غرفة الحريم وبحركه أشبه ماتكون إنتحاريه وخرت يديني عن دركسون السيكل ووقفت على رجولي متركين على مرتبة السيكل وقفزت في الهوى كالقرد قصدي كالنمر وتشقلبت في الهوى بحركه دائريه وبدل ما أوقف على رجولي بعد القفزه اللي في الهوى وقفت على هامة راسي وتركت السيكل يذهب في حال سبيله لوحده واللي بيوقفه معروف الله يخلي الجدار!!!

التتمه ----انتظرونا قربيا ابي اشوف رايكم باالقصه اول

وارقى على دبة غاز لقيتها علشان أطول أقز الحريم وهن داخل الغرفه وهمي هو ريم وبس (أبوك يالحب)أناظر أناظر ماشوف إلاكشرتي مزينها ملامحي الفاتنه وكم صعرور في الراس!!

وش السالفه وين اللي في الغرفه؟ إلا متأكد هذي غرفة الحريم بس وين راحن وليه صورتي طالعه في المرايه?وما دريت إلا بالدريشه تنفتح وعيوني تجهزت للقز إلا والله ببيالة شاهي يحبها قلبك صامخة في جبهتي مرسله من أمي الحبيبه مع بعض كلمات التدليع مثل ياللي ماتستحي على وجهك أوريك خل أبوك يجي وتشوف شغلك بس قزيت قبل لاتصمخني بيالة الشاهي ريم وهي تضحك وكانت حاطة يدها على خشتها لاوش خشتها ذي ماهي كلمه ناعمه وحطت يديها على براطمها خخخخخخخخ علشان مايطلع صوت ضحكها (آاااه ياضحكتها تقل صوت كمنجى يعزفها ناصر بن حيان الله يرحمه) أو يمكن حاطة يدها على براطمها علشان ضروسها جايات غلط!! يعني ضرس معترض في وسط اللثه جايز! الله وقتها رحت في خرايطها وتحلحلت كل صواميل جسمي النحيل المغطى بطبقه خشنه تدعى "" مشق "" حتى باالماريه كنت أسمع صوت الصواميل وهي تنحل من جسمي وتطيح تدربى في الأرض من جد بس قهر مامداني أحس بالنشوه

الأورنتيزانيه( هذي أكله مكسيكيه لاتاخذون ببالكم) لأني بيالة الشاهي اللي جتني خلتني أجي مجاوب على قفاي وعقبها مدري وش صار لمدة 5 دقاقيق يعني تقدر تقول فقدت الوعي صحيت وانا ماشوف قدامي إلا ريم عسى ماراحوا من عندنا رحت لباب الصاله واشوى لقيت نعالهم(أحسن دليل)دريت انهم فيه ماراحوا وانا اللي أنقز للمطبخ أبي أشوف هم خلصوا شرب الشاهي ولا لا ولي مقصد!! والقى طفرية الشاهي وبيالات الشاهي عليها وكانن أربع بيالات وكوب كحلي مع إن المفروض إن أمي تاخذ أربع بس لأن الضيوف ثلاثه

وامي الرابعه (أعرف أفكر)وشولوه ماخذة أمي هالكوب؟ قلت مهوب مهم واجي عند البيالات أبي آخذ البياله اللي شربت منها ريم أبي أجغم مابقى في بيالتها من الشاهي وش أسوي حبها ذبحني! وافتح خشم واقعد أشمشم في البيالات لعل وعسى أعرف بيالتها من الريحه(هذا اللي أنت فالح فيه الريحه) ريحة أمي أعرفها وريحة أمهم عرفتها(ريحة العجز بينه) بقي بيالتين وكوب وافكر شوي!!قلت بس أكيد هالكوب لريم هي متمدنه مررره ويمكن ماتشرب الشاهي إلا بكوب ياعمري!! هذا كوب ريم!! يعني شفايف ريم إرتشفت من ذا الكوب!! وانا اللي أجغم مافي الكوب من بقايا شاهي واقعد أحبب واحبب في الكوب واظمه لصدري علشانه الكوب اللي ريم شربت فيه ومادريت إلا هذي شغالتنا طرينه

(الله من زين الإسم)!!

وتقعد تناظر فيني وتطالع وقالت" إيس فيه بابا؟" قلت مهوب شغلتس أها بس!!

قالت بابا هذا كوب مال أنا!!أنا فيه يسرب ساهي بعد ما ماما جيب ساهي هنا وانا اللي تحوم تسبدي وتدور بي الأرض سته وثلاثين دوره(الأخ راكب الصحن الدوار؟)واقعد أصارخ لا لا لا هذا حقتس لالا وكردةفعل صمختها بالكوب واركض للمغسله واتمضمض وافرش ضروسي وععععع عقبها رحت لمدخل الصاله وقفت أطالع في النعال شوي وشوي بعد وقلت والله فكره ياولد ليه ما أكتب لريم رساله واحطها في نعلتها واذا جت تطلع بتلقاها وبتدري إنها مني وبكذا أكون وصلت لها ولا يهون رقم التلفون أدور قلم مالقيت خلصت أموري بكحلة أمي(أحسن قلم وقت الزنقه) وكتبت لها اللي بقلبي من شوق ولهفه(لحد يقول شوق ولهفة ليش؟ لأني مدري ذاك الوقت مراهق وبس) واكتب رقم تلفون بيتنا ورقم تلفون عبيسه ولد عمتي يعني لو مالقتني تتصل على عبيسه هو من الجماعه وما عنه غطى!! ولا بعد أتشرط كاتب الرجاء الإتصال بعد الساعه 4 الفجر وتراني من الظهر لين صلاة العشاء في الشارع مع عيال الحاره مشغول يعني إنسي تلقيني(ثقة وشموخ ممزوج بشطه!!)

خلصت وجيت عاد أي نعله وانتم بكرامه حقتها؟ ذي والا ذي والا ذيك أوووه ذيك نعلة أبوي حقت العزايم مالها دخل شف مقاسها واغسل يدك مقاسها 87 حشى أبوي من سلالة الفراعنه على غفله وكالعاده عند الزنقه في مثل هذه المواقف أسرع وأجمل حل إلا وهو حقره بقره لين العشره وعلى رقم عشره حطيت الورقه داخل النعله ورقيت لراس الدرج أنتظر ريم واهلها يطلعون علشان أقزها قزة الوداع

(أبوك ياراعي الحب) على أذان العشاء طلعوا ويوم سمعت صوتهم وانا اللي أحط سعابيل في يدي واكد بيدي شعري علشان يلبق بدل ماهو صايرن شوشه وبصوره حلوه وهادئه حطيت يدي اليسرا على خدي الأيمن ويدي الثانيه قعدت أمررها على صدري(إغراء) اللي نابتن فيه شعرتين بس وبازن فيهن كل يوم أسقيهن ماء كودهن يطولن!! وقعدت أنتظر ريم تطلع طلعت الأم وعقبها أم النفر وأخيراً حبي العذري ريم

(أويلااااوه يا عم على قولة أهل فرنسا) والا والله البنت مطنشه مهيب لمي ماإلتفتت أو بالأصح مادرت إني أقزها من أعلى الدرج بس عاد إلتفتي علي هذا وانا متجهز لنظرة الوداع

وش أسوي ياربي؟ والله واخربها واتنحنح يعني شوفيني فوق وهي اللي تلتفت علي بسرعه وشعرها قام يصقع في الجدران من طوله والمزهريه حقت الورد طاحت وإريل التلفزيون بعد طاح وشغالتنا مصطت في السيب وهي برا لأن شعرها ياجماعه قام يصقع بكل شي مع إلتفاتتها طويل طويل وما أقول إلا الله يعين أمها كم ساعه تجلس على شعرها إذا جت تفليها من القمل والصيبان(هذا اللي جى في بالك بس يابو القمل!! لعنبوا بليسك اللي براسك مهوب قمل أوادم هذي إلا أنواع الحشرات كلها مستقره براسك) المراد جت العين في العين وياعيني على لغة العيون اللي مالها كتب ولا مراجع يعني أنت وهواك فسر النظره على ماتشتهي وابن أمه يقولك أنت غلطان! ولعلني أستشهد ببيت شعر في لغة العيون يقول

" فرق يا صاحبي بين الغين والعين**الأوله فوقها نقطه والثانيه مافوقها شي ) شفت شي غريب بعيونها شي ماينوصف يابشر! خلا الغمص على جنب عادي كلنا عرب!!شفت بعيونها إني أنا وهي على شاطئ بحر الشرقيه(تخبرون توني صغير ماعرف إلا بحر الشرقيه أقصى طموحي) ماسكين يدين بعض ونركض على طرف الشاطي بعد مالعبنا شبرا أمرا شمس نجوم وفتحي يا ورده سكري ياورده

وكنت أنا لابس وزره حمرا منقطه بأخظر وشاقن فتحه فيها من ورا لين نص الفخذ(إغراء) وزنوبه سماويه

وطاقيه مشخله ومالبست فنيله(على البحر عادي) وهي لابسه شورت جينز ضيق من جد وتي شرت أحمر وشعرها وراها طاير ثاير وما تشوف أقصاه من طوله والعالم الله إن آخر شعرها كان عند محطة ساسكو على خط الشرقيه! وامواج البحر رايحه جايه(لاشغل ولامشغله) وصوت الطيور وهي تدور فوق روسنا (دنيا ياصاحبي من عقب ما الذبان كانن يحومن على روسنا صارت الطيور اللحين أية كمل بس)وكان الوقت عند الغروب ومافيه إلا أنا وهي بس

(أهل الشرقيه طلعو أجاويد قدروا الوضع وفضوا الشاطي لنا) وكنا نضحك نضحك على إيش مدري(موعودين بعسكريم ودوره بالصحن الدوار يمكن؟) بس كنا مبسوطين ووقفنا بعد الركض وكانت الشمس تبي تغيب(معها عذر رسمي من المستشفى واسطه ياعمي واسطه) وكانت على يسارنا والبحر على يميننا ووقفنا ضحك وقمنا نطالع ببعض تقل كل واحد ضايع له في وجهي

الثاني شي (كان ودي أقولها إن فيه شي طالعن من اااخشمها بس إستحيت تخبرون الموقف كان رومنسي بحت)شي كان شعور غريب بالنسبة لي بس كنت مبسوط مدري ليه! كانت في عيونها لمعه مهيب صاحيه من جد(مسكين ماعمري شفت لحمه أقصد نعمه) وكنت أحس إنها قاعده ترسم تقاسيم وجهي في قلبها

(تكفى أنت وتقاسيم وجهك اللي تقل عازفها زيدي بحلة العبيد) وانا من باب التقليد قعدت أبحلق فيها وش زودي يعني! وكان فيه واحد وراي يدفني يدفني على البنت يبيني أقرب أكثر والتفت بشوف منهو وطلع خوينا ماغيره أبوشوكه ذاك الأحمر الله يلعنه ياحبه لتدشير العالم!! وبعد ماقعدنا نطالع في بعضنا قربنا من بعض وقربنا وبديت أحس بحراره تقل نار مولعه وخلاص مررررره جينا بنح(عيب عيب عليك ياللي تقرا أها بس أدري وش تنتظر بس هين مافيه تكمله خلاص بس إلى هنا ويكفي إذا ودك تعرف وش صار رح تفرج لك على فلم هندي أبد نفس السالفه)

والله وطلعت ريم من الباب وانا غارق في بحر الهواجيس والشاطي والأشياء الحلوه ذيك

وما أدري هي غمزتلي بعينها يوم طلعت والا لا(مغازل الأولين إغمز لي وأغمزلك)

وماصحيت إلا هواش أمي على إني دايم أفشلها إذا جوها حريم كنت ساكت وما رديت ماش جتني حاله غريبه بعد اللي شفته في عيون ريم من بحر وضحك ولايهون الشورت! حسيت بحراره في صدري وقلت يمكن علشاني شارب عصير سنتوب؟ وحسيت بدوخه ونفسي راحت على عصير منقا مخلوط مع زنجبيل مع خبز يابس معفن وعليه منثور زعفران(أمحق شهوه)وحسيت إن نفسي ودها ترد(حشى هذي أعراض حمل وانا أخوك! وش سويتو في شاطئ الشرقيه أنتم؟) دخلت غرفتي المشتركه مع أخوي اللي كان نايم (أصغر مني) دحجته بكل حب وحنيه وقلت له بكل أخوه " إقلب وجهك قم إطلع برا الغرفه لا أتوطى في بطنك يادانبي( عيارته كانت دانبي) "

قام المسكين متخرع والغمص مالي عيونه( الغمص وراثه في العائله الله يكافيكم الشر) وقفلت على نفسي

الباب وتسندت على الباب وتنهدت! مدري حسيت إن حياتي توها تبدا! حسيت إني توني مولود بس مالقيت مهادي!

كنت ما أشوف بعيوني (من زين هالعيون) إلا وجه ريم وبس(ياشين القراوا إذا سوو نفسهم يحبون)

تبطحت على السرير ومن كبر السرير ياحسره مامداني ألف مناك شوي إلا وانا مصلفط على الأرض وامعط التلفون عندي واهوجس واقول"ياترا تبي تتصل علي والا لا؟" دورت ورده علشان أقطع ورقها وانا اقول بتتصل لا مهيب متصله بس وجهي وجه ورد مالقيت ورده في غرفتي وانا اللي أجمع كل سراويلي

المنثره على السرير وابدا أجدع فيهن واحد ورا الثاني ومع كل جدعة سروال أنشد واقول بتتصل ومع السروال الثاني لا مهيب متصله

والحمد لله أول مره تصيب معي وكان آخر قطعه ذبيتها مع كلمة تبي تتصل هو صدز والصدق حبيب الله إن آخر سروال جدعته كان مع مهيب متصله بس قلت ياولد ولايضيق صدرك وامعط واحد من السراويل واجدعه مع كلمة تبي تتصل هاه صار شي؟

إنبسط ياعم ولاتزعل!

راس ماله سروال لاراح ولاجا( ولا عمره إنغسل )

وجلست عند التلفون أنتظر صوت ريم (قروي صدق من اللحين تنتظر) مع إن الوقت توه العشاء,ودخل علي أبوي في غرفتي فجأه وبدون مايطق الباب (أما يطق الباب ياحبهم هالشياب لذي الحركات على بالهم) دخل علي وكنت حاظن التلفون ويوم فتح الباب وانا اللي أنقز واطالع في عيون أبوي اللي كان الشر يتطاير منها! قالي لي"وش كنت تسوي يالهيس الأربد؟" بسرعه وبربكه وببرائه طفوليه

كني مدري وش يقصد هو رديت عليه لايروح بالك بعيد يبه! والله ما كنت أسوي شي؟

ويوم طلع إيده الثانيه من ورا ظهره والا والله هاك اللي الأحمر اللي يحبه قلبك وبدا مسلسل المساج المسائي لزخه من هنا ولزخه من هناك إيلين توسم كل جسمي وفي النهايه طراق خلاني أزق في الربعه قمت أتعبر واصيح في نفس الوقت واشاهق ليه ليه تضربني لييييه؟ إذا ماتبيني طلقني!!(وش أسوي كذا يقولون في المسلسلات)

قال أنت تدري يالسرسري ليش أنا طقيتك؟ قاعدن تفشل أمك يوم جوها الحريم! ماتستحي على وجهك أنت؟ إلى متى وانا أقول كودك كودك تعدل بس ماش مامنك رجا(يعني شلون مامني رجى؟ ماراح أقدر أجيب أطفال يادكتور لألأ!!)والله وطلع وانا منحشر في الربعه تقل قطو ملاحقينه بزارين الحاره ولاعنين والدين والديه تلزيخ بالزبيريات قمت وطلعت من غرفتي ولملمت قطع وجهي ورحت للعيال في شارع الحاره ومارست طقوسي طبيعيً ولاكني تلفعت ولاتلزخت عادي وش صار يعني كل يوم كذا!

رجعت للبيت الساعه 10 بالليل ونصيت غرفتي وامي أرسلت الدبس أختي الصغيره تقز وتشوف وش معي ووش مامعي(طرق العجز للتجسس _وين مخابرات إسرائيل عنهن بس)جلست في غرفتي بعد لفيت فنيله على إصبعي اللي إنقشع ظفره لأني جيت بشوت الكوره وانا ألعب مع العيال في الشارع وشت الزفلت وانا أقول متى يجي الفجر بس علشان ريم تتصل علي وحشتني مره(ياشينك بس).راح الليل مابين لعب أتاري

وهواجيس في ريم وفي مستقبلنا المزهر اللي راح نعيشه بعد مانتزوج ويوم جت الساعه أربع وانا اللي أجيب التلفون عندي على السرير وانتظر مدري حاس حاس إنها بتتصل علي!!

أربع وعشر دقايق رن التلفون(العشر دقايق لزوم الثقل تخبرون البنات وثقلهم اللي زي وجيههم)

وارد بسرعه وميوعه"أيووووه"<== متعلمها من ولد خالتي غزلنجي دايم يقولها قلت يالله زيه إلا والله هااااك الصوت اللي يرد الروح فيك يقول صباح الخير قلت صباح النور والطش والرش والبيض المفقش(غزل على بالي)قالت أنت بيزا؟ قلت إييييه أنا بسلامته من أنتي؟

(على بالي عندي أكثر من خويه حركات تعلموا بس) قالت أنا اللي أنت حطيت لها الرقم في النعله"وتنتظر إتصالها"(أبوتس من ثقه بس) قلت ريم يعني؟ قالت إيه يابو عيون زايغه(يوم قالت ذي الكلمه بغيت أصك الخط وانتحر حسبتها تتغزل فيني هما فيه عيون زرق وعيون خضر قلت هذا لون جديد إسمه زايغه) المهم أحم أحم قلت لاوالله بس شكلتس حلو مره وشعرتس ولبتس حلو كل شي فيتس حلو بصراحه شديتيني مع شوشتي لمس(على بالي بخليها تخق معي بأسلوبي)ضحكت بثقل شوي وقالت والله أنا متصله مو لشي على فكره ترا هذي أول مره أكلم واحد غريب غير إخواني(يعني إييه كلكن تقولن تسذا والبلشه ضعنا ماعاد ندري من نصدق فيكن)قلت لها والغرور يعتلي محياي(ودي قسم بالله أعرف وشو محياي ذا؟ هو فوق الخشم يجي والا تحت البرطم وينهو بالضبط في الوجه؟) قلت: وانا بعد آخر مره كلمت فيها بنت قبل شهرين وانتهى حبنا نهايه مأساويه من جد!!قالت وش صار لحبكم قلي؟ (يحبن تراهن ذي السواليف كثرو منهن شباب) قلت والله أبو البنت صار له حادث ومات والأم تزوجت وتركت عيالها واكبر إخوانها سحرته مغربيه وسافر معها واخوها الصغير دخل الأحداث واخواتها تشردن وحده إنهبلت والثانيه إختفت محد يدري عنها وبصراحه حامت تسبدي منها ومن عايلته وتركتها ماعلي قاصر هموم!(أقول أمحق حب وتضحيه)وتوها بترد على كلامي إلا باب غرفتي ينفتح ومين كان؟

الشاكوش أبوي لابس ملابس النوم الرسميه وهي عباره عن سروال لاهوب طويل ولاقصير واصل تحت الركبه ولونه أصفر وكرسيه مخضر مدري وش يطلق عليه وفنيلةعلاقي والكرشه من وساعةالوجه تويدز من تحت وسر بطنه وياعيني على هاك السر وش أقول ووش أخلي بير والعافيه وبالعاميه قليب كان أول يوم إننا صغار يملى سره مويه ويخلينا نسبح به ونطافش وناسه كانت,بس عاد كبرنا وضاق علينا سره صرنا كل يوم واحد مننا يسبح فيه والطاقيه الصفرا اللي يلبسها حتى وهو نايم ( أصلع ومستحي يواجه الواقع )وعلى إيده اليسرا الساعه اللي عيى يغيرها تكفى يالروليكس عاد! وارثها من أبوه ومحليه ومتأخره ألف ساعه ومع ذلك معيي يغيرها(أبوك ياراعي التراث)

وفي يده اليمنى شي يلمع طويل لونه أحمر: بيزا ولعنه تلعن العدو من تحاسي هالحزه؟ وانا اللي أنخرش وارتبش مادري وش أسوي أصك السماعه في وجه البنت والا وش( حسوفه ماصدقت إنه تتدق) قلت بعد التعتعه هذا هذا عبيسه يبه يبيني أجيب دفتر الرياضيات له باتسر بالمدرسه(تصريفةحوطي) قال عبيسه أجل هاااه؟قلت إيه عبيسه وهو اللي يمعط السماعه ويتسمع(يالقفه بعد)

واثر البنت إرتاعت علي وجالسه تقول ألو ألو بيزا وش فيك تكلم(تحبني موت بعيد عنكم)ووالله تسن الشايب جاز له الصوت أشوفه طول؟ويبدا يلمس كرشته بيده!ويدخل يده في سره وفجأه!!طلع من سره كورتنا الزرقا ذيك النايلو وحنا لنا أسبوع ندوره أثره ناشبة في سره وابي أحاول أرقع الموقف وهو اللي يداهمني بلزخه من اللي الأحمر خلتني أتلوى في محلي وقمت أرقص تقل مايكل جاكسون من حرة اللزخة آآآه وهو اللي يحتسي ويقولها عمى يعمي قلبتس بلا ياللي ماتستحين على وجهتس ماعندتس أهل أنتي؟ ياقليلة الحيا ترا والله العظيم إن إتصلتي مرتن ثانيه إني لأعلم الشرطه ترا رقمتس واسمتس ووصف بيتس طالع عندي هنا(ياكبرها يبه ذي زين ماقلت لون ثيابتس بعد ؟)والمسيكينه صكت السماعه من الخرعه(بنت ماتستحمل ياربي حرام) وهو اللي يشيل التلفون معه ويقول لي كلام معك يالسرسري باتسر هين دواك عندي وقعد يناظرني بحقد من جد شكله حقد إني قدرت أشبك بنت وهو يومه بعمري ضب ماقدر يصيد وودعني بلزخه وهو طالع مع رفسه خاطفه برجله في بطني(حشى أبوك هوك هوقن حق المصارعه على غفله!)

هذي اللتمه والباقي لما اخلص اختبارات

يسلموووووووو محمد على القصه كتيرررر حلوووه ..

بس وين باقي القصه نزلهااا ..

<<< البنت اندمجت مع سوالف بيزا .. lol!

سي يووو ..

ههههههههههههههههههههههههههههههههههههههههههههههههههههههههاي<مت من الضححك
يلا كمـــل ...الأكششـــن خذانـــــي .. اتخيلكم كلكم شباب المنتـــدى جذـــي <<ههههههههههههههههاي
يلا ناطــــره التكمــــــله

هـــــ والله ــــــلا وشلونكم عساكم طيبين اسف على التاخير كان ودي انزلها لكم بدري لاكن الهوى ضدي بسبب ظروف الله اعلم فيها ما اطول

يالله نكمل الاكشن ونشوف اخرتها مع بيزا...................هههههه

---------------------------------------------------------------------------------------------------------------------

خنقتني العبره بعد والشهاق وصل ماوصل مني,قلت أكيد خلاص ريم صدقت كلام الشاكوش وماراح تتصل علي آآه ياحظي آآه,أصبحنا واشوا الشايب كان مهوب فيه طالع يكد على الونيت وانا اللي أطلع للمدرسه وفي الفسحه قعدت أسولف للعيال واقص لهم اللي صار كله أحلا أحلا ياراعي البنات أنت من قدك ياهوووه صار عندك خويه اللحين أجل الله يعينك على سهر الليل بس ياشيخ هم يقولون ذا الحتسي وانا فاقن خشتي مدري وش الطبخه؟ قلت شلون يعني أسهر الليل شباب؟ قالوايعني خلاص أنت اللحين عندك خويه تحب يعني! قلت إيه فاهم بس يعني وش؟ قالوا يعني تكلمك في الليل إذا ناموا أهلها وتقعدون تسولفون السواليف ذيك! قلت هو فيه بعد سواليف غير سواليفنا ذي(بريء ياعالم وش أسوي بعمري بس) قالوا إيييه وين أنت عايش بس والله يانت بتنبسط بعد!قلت لهم خلاص خلاص بس عاد غيروالموضوع

وهم اللي يزودوني بالمشوره والله من زين المشوره من هاك العرابجه!!

اللي يقول إنتقم من أبوك هو السبب إنه فرقك عن حبيبتك يعني إنهي حياته إمنع عنه القهوه والتمر لين ينتهي!!واللي يقول رح طب في بيت البنت بالليل وتسلق الشجره الطويله اللي جنب دريشتها وطق دريشتها وكلمها وصارحها باللي صار(متأثرالأخ بروايات عبير!)واللي يقول خلها عنك بس واذا عندهم شغاله حبها وخل البنت تموت من القهر (أبوك من تفكير!!) وذاك يقول شف ياحبيبي(هذا عاد ياحبه للفلسفه ماحبه بس دايم يباشر علينا ببسي) قال شبك مع أعز صديقه لخويتك ذي وخل نار الغيره تشب في قلبها يابن الحلال(وانا قادر أشبك ريم علشان أشبك خويتها أقول مالت بس) والا ذاك اللي يقول لو إني مكانك بنشرت كفرات المرشد الطلابي وكسرت قزاز سيارته!! وش دخل المرشد في الموضوع مدري!

أحسن واحد شار علي هو البرصي(لقب واحد من الشباب عادي تصير في أحسن المجتمعات)رحت أتمشى أنا وياوه في فناء المدرسه(لاحظوا فناء منيب عاقل ماكن هالفناء اللي أنا أحتسي عنه ملعب الكوره اللي بدال مايزرع حاطين لنا تراب وش دعوة شايفينا ضبان على غفله)وشريت له سفن أب علشان نبدا نتصارح من دون خجل(سفن أب الشيح حق المراهقين) قالي: لو إني مكانك يابيزا تسان أروح لمدرستها اللي هي تدرس فيها وتنتظرها لين تطلع مع باب المدرسه وتحاسيها هماك تقول السواق هو اللي يجي ياخذها عادي يعني سواق أطقع ماشافت عينك هو!!

الفكره جازت لي من جد وقلت بنفذها حار بحار وانا اللي أفرك من المدرسه الحصه الرابعه وانط من فوق الشبك حق المدرسه وانشق ثوبي من الشبك اللي لايعيد(زين جت على الثوب غيرك إنشق لهم الثوب خلها مستوره بس) وازبن عند الفوال علي(أحسن شي إنك تسويه إذا بغيت تقابل بنت وعلشان تروح عنك الرهبه والخجل هو إنك تاكل من هالفول لين تدوخ وتكملها بحليب بوني مع شاهي ووقتها معد تفرق معك تقابل بنت والا عشر متساويه في عينك) واتزين عنده واكد شعري بمشطه الأصفر وهالمشط صاير تقل مشط العائله كل من جى وطلب صحن فول وقف عند المرايه وكد شعره بالمشط الأصفر والبس الشماغ حق علي اليماني وش أسوي كان أنظف من شماغي حزتها صحيح إن لونه أخضر بس نظيف لين ماجت حزة طلعت ريم من ثانويتها واروح لمدرستها واسنتر عند الباب والا والله عالم تخترش وهذي أول مره أجي عند مدرسة بنات حزة الطلعه(خلاص أدري نصاب كنت دايم أعسكر هناك إرتحتوا حتى بغوا يوظفوني بواب من كثر ماترزز في القوايل عندهن)واشوف كلن يجي ويروح للبواب ويعطيه الإسم وهو ينادي بالمكرفون وانتظر أنتظر

أبي إسم عايلة ريم يصدح فيه البواب وماش مابعد جى سواقها قلت ياولد وشوله أنتظر أنا؟ ورا ماروح للبواب واقوله ينادي عايلة ريم وهي بتطلع(ذكي) واروح للبواب ووالله شكله أقشر يخرع وبيده خيزرانه مدري وشوله (إسالوا بنات الثانوي) قلت ياعم ناد عايلة الفلاني بسرعه وجلس يطالع ويقز فيني هاك الشايب وقال من أنت أول مره أشوفك فيذا؟ قلت له وانت وش يخصك؟ ناد وانت ساكت أنا أخوها!! وهو اللي يلزخني بالخيزرانه على قفاي يوم نقزت من محلي وقلت <أتسذب أتسذب أنا ولد خالتها وسواقها مصخن ماقدر يجي وخالتي وضحى أنتي يا أم ريم قالت لي رح جب بنت خالتك ومرسله معي ولدها الصغير محمد أبو سنه ونص يقالك محرم خلاص إرتحت اللحين؟ قال إيه أشوا بعد وهو اللي ينادي عايلةالفلاني ومع كل مره يردد إسم العايله قلبي يرجف ودمعي ينزف وحواجبي ترفرف!! أخيراً أخيراً طلعت ست الحسن والدلال طلعت ريم بعد طوايفي عرفتها من طولها وتقاسيم جسمها(الزوائد وما أدراك ما الزوائد ياعيني بس زوائد جايه في محلها صح مهوب زي باقي البنات اللي أجسامهن تقل علبة ببسي لاخصر ولاهم يحزنون والوحده منهن ماتدري هي معطيتك وجهها والا قفاها)طلعت وهي متغطيه ولافه العبايه على جسمها بقوه ورافعتها بشكل بسيط لين نص الساق(حركات الغزلنجيات أول زمان وراح مالت علي ليتني مراهق هالوقت) وانا اللي أقرب من باب المدرسه وما أشوف قدامي إلا ريم وامد يدي ليدها بكل حب وحنان واركع على رجليني عندها والعالم تطالع وش يبي ذا؟ وريم يوم شافتني إستغربت وش جابه ذا هنا(الحب ياخلف طوايفي الحب)وامسك يدها واحبها في لحظه مقدر أقول عنها إلا أنها كانت أجمل لحظه عشتها في حياتي صحيح إني سعبلت على يديها موب لأني أرفل ماعرف أحب لا لأني إنسجمت مع القبله وريحة البصل اللي في يدها!والبنت المسكينه إنصدمت ماتدري وش السالفه وانا مازالت براطمي ناشبه في يدها! وبعد ماحبيت يدها رفعت عيوني لمها بعد ماحطيت شوية سعابيل بيدي وحطيتهن في عيوني على بالي معذب في هواها ورفعت عيوني الزرق لوجها أقصد لشيلتها وصدقت الموقف أنا وش أسوي عاطفي مره وقمت أبتسي والى هنا حلو.البلا طلعت بلاوي من خشمي تخبرون مع الصياح وبلاويي أنا غير شكل عاد يبيلها مناديل لف علشان تمسحها والله البلشه ياولد وبحركه سريعه مسحت البلاوي اللي في خشمي بكم ثوبي (منديل القراوا) جيت بتكلم واعتذر لها واقولها إني أحبتس ياريم تكفين حبيني وبدال ماقول لها كلمة آسف قلت آااااااااااي!! أثاري البواب هاك الشيبه ماجاز له اللي أنا سويت وهو اللي لزخني مع ظهري بهاك الخيزرانه(وش ذا الواحد مايعرف يعبر عن مشاعره في Public‏ ‏Place‏؟ لاتفوتكم اللغه بس تقدر أنت وياه تجيب زي ذي الكلمه ببلك بليس) وليتها جت على البواب كان تهون إلا باقي الشباب والشياب اللي ينتظرون أهلهم إستلموني طق بدون مايدرون وش السالفه!!وعينك ماتشوف إلا سعابيلي منثره في كل جهه ياللي ماتستحي على وجهك!! يا قليل الحيا(هو أنا فيني حيا من الأصل علشان يصير قليل) واللي يمعط شوشتي واللي ركبته تطحن في بطني واللي دخل يده كلها في فتحة خشمي اليسر (أموت واعرف وش يتوقع بيلقى يعني؟) وما قهرني إلا واحد دخل يده في إثمي ويمعط ضرس الذهب اللي وارثه من جدي طوني الله يرحمه ومشخص به وابن الذين قلعه وحطه في جيبه!!وآخر شي شافته عيوني قبل لاروح في غيبوبه من طقهم ريم حاطه يديها على خدودها(من ورا الشيله طبعا) وتصارخ بخنقه(مصارخ البنات)وتقول" لألألأ حرام حرام عليكم ذبحتوه ذبحتوه"

وانا اللي أغمض عيوني غصبن عني طبعا حالة إغماء وانا مبسوط على كلامها وبعدها مدري وش صار؟

لقيت نفسي في بيتنا وراسي ملفلف عليه شاش ورجلي مجبسه واخوي الصغير قاعد يشخبط بقلم على الجبس وامي فوق راسي تون وتبسي والشايب جنبها يهاوش ويتوعد (راحت حياته الله يطول بعمره وهو مغير هواش في هواش) ياللي ماتستحي على وجهك وصلت بك المواصيل إنك تروح تغازل بنات الناس عند باب المدرسه؟ تبي تفضحني عند الناس أنت؟ وانا ياحول ماقوى أقول شي الوجع هادن حيلي(يعني لو كنت تقدر تحتسي وش بتقول لابوك إلفقه بس) جلست في بيتنا أسبوع كامل ماطلعت لين صاروا أهلي يفصلون التلفون في الليل علشان ماتتصل علي ريم وزارني ذاك اليوم عبيسه ولد عمتي وسواليف معه وانا منسدح على المطرحه في المجلس تقل نفاسيه قالي والله يانت يابيزا صرت شي اللحين!! كل عيال الحاره يتكلمون عنك وعن اللي سويته عند مدرسة

البنات ذاك اليوم وانا متشقق من الوناسه وبين السواليف قال ترا ذي ريم خويتك شفتها في بقالة أبوحسن أمس يوم نقز قلبي من صدري وراح أخذله لفه في السيب وجى من الهبال وقلت له وش قالت ووش قلت لها؟ إحتس؟ يوم فق خشته السبهه قال هاهاها وش فيك أو هذا الحب اللي يقولون عنه؟ وانا ألزخه بكف على وجهه ناقصك أنا بعد إحتس بس! يوم قال إني كنت في البقاله حقت أبوحسن زي العاده عند الثلاجه أسرق لزقات السن توب علشان أكمل الدفتر حقهم وجت ريم ومعها أختها الصغيره أم خمس سنين ويوم شافتني قالت لي أنت صديق بيزا؟ قلت لهاإيه تراه ولدخالي بعد!يقول يوم خنقتها العبره وقالت لي وهي تمسح دموعها وش أخباره اللحين طمني عنه تكفى؟ يوم قال ذا الحتسي وانا رايح من قلب في خرايطها لدرجة إني صرت في حظن عبيسه وهو يقص علشان أندمج معه!! وقال قلت لها إنه ماعليه تسنه طاب شوي وطلع عبيسه منديل أحمر فيه بلاوي الدنيا تقل خشوم الناس كلها مرت عليه وقال عطتني ذا المنديل وقالت عطه بيزا لازم!!
مسكت المنديل وقعدت أناظره شوي واناظر عبيسه شوي وقلت هو المنديل كان بالشكل هذا لما أنت أخذته منها؟ طالعني كذا وقال لا بس تخبر إستخدمته شوي يعني وش صار أنا وانت واحد يعني لو أنت أخذته قبلي أكيد بتستخدمه زيي صح؟
يوم أظلمت الدنيا بعيني
!!

منديل ريم الأحمر المعطر اللي أرسلته لي صار تقل خيشه من خشم عبيسه والتفت وراي وانا في حظنه والقط الدله واهبدبها على جبهته قم قم لابارك الله فيك ياوجه الفقر لعنبوا حيك متى بتتعلم أنت؟ منديل ذا منها لي ياجنط مهوب لخشمك قال أجل وشوله مرسلته لك قلي؟
قلت ياغبي هذا تذكار يعني أحطه في مخباتي بدال القم أكشخ فيه يعني لكن اللحين وعقب خشمك معد ينفع من باتسر وانا اللي مليت من ذا الجبس في رجلي وانصى جدار الصاله والزخ رجلي المجبسه فيه وتكسر الجبس وافتكيت منه(بالله هذي وجيه ناس يستاهلون طب حدهم الصمعاني ويخب بعد؟) ومن بكرا الصبح داومت في المدرسه وقابلت العيال واثر الخبر واصلهم!ياهوووه يابيزا أثرك منتب صاحي إيه هذي علوم الرجاجيل والا بلاش!!(أي علوم رجاجيل) وبقدرة قادر صرت أنا العمده على شلتي بعد ماكانوا يصرفوني!

صرت رجال اللحين ولو من قدي حبيت يد ريم في ببلك بليس(ياذي الكلمه اللي صجيتنا عندها) اللي يقول بالله كلمت خويتك ريم خلها تشبكني مع وحده من صديقاتها!! والثاني يقول بيزا حبيبي ترا أهلي بيسافرون الخميس الجاي يعني بيتنا فاضي واذا حاب تطلع خويتك ومزنوق بالمكان ترا بيتنا سداد بس لي شرط وهو إني أقز خويتك شوي من ورا الدريشه وهي مهيب داريه!! والا الشين أبو نبخه جاي يقول عساك ماسك صور عليها بس والا شريط صوتي؟ ترا البنات والله مالهن خاتمه خذها مني إمسك عليها شي من اللحين علشان ماتطلع من شورك(قم بس واللي يرحم والديك أنت وهالنبخه اللي بخشمك تقل اللمبه الحمرا اللي في برج التلفزيون!!) المهم إن نفسيتي كانت من جد خايسه (عندنا مصطلحات غريبه وش نفسي خايسه ذي بعد؟)

أبي ريم هذا اللي في بالي أشاور العيال العاقلين هاه ماعندكم مقترحات أبي أشوفها شلون؟ وماش العيال طلع تفكيرهم نفسه قصير عقولهم جيمت خلاص ويجيني عبيسه ولد عمتي وقالي شف"محد يقدر يخدمك في هالموضوع إلا حبلوص!!" قلت بس حبلوص هذا قايلي أبوي لاشوفك معه لاحش رجولك حش قال يارجال وابوك يدري وش السالفه؟ وش بيدريه؟ قلت براسك ياولد!

ويوم جى المغرب وانصى حارة حبلوص,وحبلوص هذا كان من أكبر دشير الحواري ذيك الأيام شري وداشر

لقيت حبلوص جالس بالعاير والشماغ على الكتف وفاتح الزره هو وشباب معه وجنب حبلوص ولد الهوى وائل السوري(والله يانا قديم بعد) لا يروح بالكم بعد ترا الدعوه بس معزه (الصراحه معزه!!)سلمت عليهم وطلبت حبلوص في كلمة راس وقلت له أبي الفزعه تكفى!! قال آمرياحلو رقبتي سداده!! ويوم قالها طقتني النفاظه مدري ليه مر طاري شرفي في مخيلتي ذيك الحزه!! قلت الله يسلمك السالفه تسذا وتسذا وابيك تدبرني تكفى؟ قام ينتف شنبه شوي(من قده كان له شنب ذيك الأيام) وقال ولايهمك أنا أدبرك واخليك تقابلها بعد قال إيه تكفى ياحبلوص ترا حالتي والله متعديه الشين ضحك وقال إلى هالدرجه؟

لا أجل يبيلك تسهر معنا الليله وتروق!! أروق؟ قلت وش تروقون عليه أنتم فيذا؟ حنا بحارتنا نروق على التتن أبوبس! قال والله يانتم مغبرين بعد! إصبر وشف بعينك قلت يالله وش وراي أنا معكم وجلست معهم حول الساعه وبعدها رحت أنا وحبلوص وثلاث معنا ماعرفهم لبيت توه يعمر بآخر حارتهم ( الله يستر الشرف ياولد)ودخلنا في الملحق وطلع حبلوص ورجع ومعه علبه لونها أسود على أصفر كبر الكف! وفتح العلبه ودخل خشمه فيها وقام يشم ويشم وانا فاقن أثمي مدري وش العلم! وشوي وعطى اللي جنبه العلبه وسوا زي حبلوص ودارت عليهم العلبه ووقفت عندي وتوهقت أخذت العلبه وقلت ياحبلوص وش ذي العلبه؟ ولع زيقاره وجا بيتكلم وقام يكحكح (بزر مايعرف يتكلم ويطلع الدخان من خشمه بوقت واحد خخخ)وقال هذا ياحبيبي إسمه"باتكس" هذا اللي حنا نروق عليه هنا مهوب زيكم بس تتن! قلت وش يسوي ذا بعد؟ قال هذا يخلي مزاجك عال العال تبي تنبسط جرب وشف! بكل دلاخه قلت طيب قلت وش أسوي بس أدخل خشمي في القوطي واشم؟ قال إيه وخذ نفس بقوه بعد!وانا اللي قلت بجرب يعني ذولا أرجل مني! وبحاول أدخل خشمي في فتحة القوطي وعجزت خشمي مهوب خشم آدمي ياحسره إلا تقل واحد متعلق في وجهي يمين يسار ودخل خشمي وانا أشم وبقوه زي ماقال لي حبلوص والا الريحه تصرع ياعرب واطلع خشمي وشوي واشم وارجع أشم!! والا ياولد تسن الدنيا بدت تدور!! والألوان بدت تدخل في بعض؟؟ ونااااااسه ياولد!!وراحت هاك الليله والقوطي يدور علينا وضحكنا واصلنا تلا الشارع ثم تفرقنا وكلن راح لحاله وانا رجعت لحارتي بس وانا أمشي كنت مبسوط بشكل غير طبيعي والبلا ياعقاب مدري وش جاب طاري ريم في بالي والف على بيتهم وارتز عنده أفكر أفكر ودي بس ألمحها والا أسمع همسه من براطمها والا حالتي منتهيه من ورا باتكس منصطل والعافيه!! قلت بطب على بيتهم واللي يصيريصير!أنا لازم أشوفها يعني لازم(بزر ومسكت معه غلط)وارقى على الطبلون حق الكهرب ومنه على السور واطب على البيت والا والله البيت كبير وش ذا كل ذي أسياب(قروي ياحسره ماقد شاف أسياب) والف على البيت واخيراً أخيراً شفت اللي أسمع فيه دايم وماعمري شفته شفت المسبح ليتني جايب كاميرا معي بس بس قلت في نفسي! هذا هو اللي صاجينا عنده ؟ والله يابركة أم النعال حقت عمي حمد أطلق منه وادور أدور في السيب ضايع مالي هدف(ولا بلنتي)والا والله تسني أسمع صوت جاي من طرف السيب بهاك الظلمه تحت الشجر!! وش ذا قطو؟ بس هذا صوت ونين ياولد هي القطوه تون تسذا؟ وادقس على شوي شوي لين ماصار بيني وبين الصوت إلا شجره وانا اللي أتوزا وراها(مطاردات وخر بس)واغمض عيوني واقفل فتحت خشمي اليمنى بصبعي علشان أسمع زين وبوضوح(ياحوطي الصوت وراك إلتفت وبس؟)

والا ياولد العلم موب اللي أنت تبي!! طلع فيه صوت ونين ثاني!! يمكن قطوتين في خلوه قلت,جيت بمشي على نياتي بس اللي وقفني هو إني سمعت صوت رجال بلغه عربيه مكسره(قل هندي وخلصنا) قلت عمى يعمي العدو!! بمشي مره ثانيه بس عاد ذي المره اللي !وقفني شي أعظم لا ياولد الدعوه خربانه تحت الشجره سمعت صوت نسائي بلهجه عربيه مكسره(قل شغاله وفكنا) قلت وش عندهم ذولا؟ يمكن أبو ريم متقظي وذولا توهم يصففون المقاضي؟ أجل وشو اللي جيب هنا شويا شويا ذا(مدري عنك) قلت بطب عليهم الظاهر إني إرتفعت مع الباتكس وخر خلني أشوف وش العلم بس وليتني ماشفت طبيت عليهم وتخرعوا تقل مفاصيخ مكبوبتن عليهم مويه بارده!!هم كانوا مفاصيخ بصراحه للأسف وانا اللي لفيت وجهي عنهم من الحيا بسرعه(إيه هين هذا وجهي إن كانك مافصلتهم تفصيل أجل تقول لي لها حبة خال عند سرها)واثر أبو هنود مهنا أسرع منه الخبيث وهو اللي ينقز ويحط رجله من فوق السور وبنطلونه بيده والشغاله بدت تصارخ وتولول(عاد فلبينيه شلون تولو تسنق بينق بووووووق

يمكن تسذا) وانا واقف مدري وش العلم ما غير أناوالشغاله وخلاقينها جنبها(واقف تقز أدري؟) والمقرود مقرود وهذا أبو ريم طلع من باب الصاله يركض وهو شايل عجره ووراه حرمته وعند الباب وقفت ريم إيه ريم ريم أخيراً شفتها بس ماكل مايأكلوه المرأ يهظمه موقفي كان سيء كيف لا وبجنبي شغاله متعريه ويوم شافني أبو ريم إنهبل وطار عقله زود يوم شاف شغالته مفصخه!! وزوجته فتحت أثمها والشغاله تصيح وتقول هزا نفر بابا فيه يمسك أنا ويشيل هدوم مال أنا ويبغى يسوي شوغول مافيه كويس بابا!!

وانا ماغير أوزع إبتسامات على الحظور قال أبو ريم أفااا بس أفااا عليك,أنت تسوي هالسوايا؟ أنت بيزاا ولد جارنا ولد الحمايل تطمر على بيتنا وتسوي تسذا بشغالتنا المسيكينه بنص الليل(يعني لو بالنهار عادي؟)

قلت ياعم ترا الموضوع مهوب تسذا أنا..أنا.... ويوم إنعقد لساني بسبت إني شفت ريم جت تمشي لمنا(يلوموني في الحب إيه كمل) وقربت مننا وهي حاطه يدها على خشتها وعيونها مفتوحه على الآخر وكانت لابسه تكميلة رياضه(بجامات القراوا) ويوم شافت الشغاله مفصخه وانا بجنبها واقف مرتز شهقت بقوه وقالت"لالالا مو ممكن أنت يابيزا"قلت يا ريم والدموع بدت تصبصب من عيوني(إنتهى مفعول الباتكس)لالايروح بالتس بعيد هذا الهندي هو اللي سوا تسذا أنا بريء...أنا ماعرف أسوي تسذا والله وراحت تركض للبيت بس قبل ماركضت صقعتني بنظره حسيت كأنها طعنتني(لعنبوا ذا الحب إن تسان كله إطعني واطعنك وش ذا حرب هي؟) حسيت بأنها ماصدقتني وانهاكرهتني بقوه وجيت بلحقها للبيت(وسيع وجه)ويمسكني أبوها وهو يقول وين وين يابو الشباب حشى وش هالنشاط فيك ماكفتك الشغاله بعد وش أنت ماكل فياقرا!!!!

وتجي أم ريم وتلبس الشغاله وتاخذها معها ويجرني أبو ريم مع أذني لبيتنا ويطق الباب على أهلي(رحناوطي)ويطلع أبوي بزيه الرسمي حق النوم ماغيره ويبدا أبوجيراننا يقص لبوي اللي صار على إني طبيت لبيتهم علشان شغالتهم ويوم بدت الشر يتطاير من عيون الوالد وعرفت إن اليوم هو آخر يوم لي في الحياه شكلها بيلفعني لين يسيل الدم وبيدفني في المزرعه جنب نخلة البرحي أبد في الحوض يعني بيدلي البزبوز حق الحوض يصب على تربتي ياحسرتي هو جرني أبوي للبيت منا وصك باب الشارع بعد ماتأسف واعتذر من جارنا وهو اللي يستلمني قلبها مصارعه حره مسموح فيها إستخدام ماطاح بيدك بلكه,مطرقه,محش,سطل,بطاريةالجمس الخربانه اللي ورا الباب(طيب خربانه إجدعه ياحبك لتجميع ذي الخرابيط)وآخر شي داهمني فيه على غفله وغدر كان دبةالغاز مقاس 25 رفعها وجدعها علي بلارحمه واستقرت في بطني وهذا آخر علمي بذيك الليله السودا بعد العمل الذي إعتبرته منظمة الأمم المتحده إجرامي بشكل رسمي إلا يوم لزخني أبوي في السيب بعد مادرا إني طاب في بيت جيراننا رقدت في مستشفى الشميسي لمدة أسبوع يقولون مستشفى هم,بس اللي شفته غير والله أنا أسميه معمل تجارب موسع أجل داخل عندهم على إني مكسر مهنا عصن فيني صاحي وتاليتها يشقون بطني قالوا إيش فاقدين وحدتن من الفوط في المستشفى وصاروا يفتحون بطون المرضى اللي سووا لهم عمليه واللي ماسوو لهم(ولوإخلاص في الشغل)المراد صورتي تشوهت عند أهلي بعد اللي سويته

(من زين صورتك قبل عاد!!)واجتمعوا أهلي كلهم صغيرهم وكبيرهم حتى شغالتنا طرينه إجتمعت معهم يعتبرونها من العايله أهلي وبعد مشاورات بينهم عن اللي سويته ودوافعه قرروا إنهم

يزوجوني مهوب حبن فيني إلا تسكيرن لباب الفضايح وكلام الناس وكل هذا صار وانا ياغافل لك الله منسدح على ظهري شاقص ماقوى أتحرك على السرير الأبيض(أماأبيض في الشميسي قصدك أصفر)جتني الوالده تزورني وجابت معها قرصان وجريش وفلة حجاج مع إن الدكتور مانعني من الأكل معدتي تعفطت بعد الطق ماغير غثوني بالمغذي ليل نهار ولا من وساعةالصدر إذا جت السستر تشيل المعذي قلت لها ممكن عود أسنان لو سمحتي!!
قالت لي الوالده ترانا خطبنا لك ياوليدي!!
والله يانا إنبسطت بعد مدري وش جاني?جاني نشاط وحسيت إني طيب وقلت لها من يمه ريم؟
قالت ياوليدي خل عنك ريم ذولا ثوبهم مهوب من ثوبنا(وش يعني ثوبهم الأصيل وحنا الدفه?) قلت أجل من خطبتي لي يمه؟ قالت خطبت لك حصه بنت خالتك(ماتسميها أول إلاحصيص بس على بالهاتبي تغريني قالت حصه)يوم قالت إسمها وانا اللي تحوم تسبدي قلت يمه حصيص عاد!!
أصوم وافطر على بصله مابي مالي دخل غير ريم ماراح أتزوج(تكفى ياشيخ) وآخر واحد كنت أبيه يجي جى دخل أبوي وتقوله أمي عن كلامي وهو اللي ينصى الثلاجه اللي جنب سريري وياخذ له علبةعصير(هذا اللي هو يجي علشانه العصير والا مهوب لشوفتي) قال إسمع عاد علمن جاك ثمن تعداك تبي تعرس على حصيص بنت خالتك!! أنا حسيت إنهم مصممين وقلت ياولد لاتخلي خجلك من والدينك يتسبب في دمار حياتك العاطفيه

(مقطع من فلم مصري رومنسي) قلت يبه وانتي يايمه إسمعوني شوي زين

قال أبوي أها إنهق وش عندك( أنواع التحطيم أجل إنهق )قال الله يسلمكم أنا..أنا..وكل ماجيت بقولها وناظرت عيون أبوي خفت يخوفني أحس إنه في أي لحظه ممكن يلفني بطراق إذا ماعجبه كلامي وامي ياعمري أشوا منه كنها حاسة باللي فيني كأنها حاسة إن فيني معاناة داخليه ناتجه من تصادم المشاعر مع الواقع في شارع مظلم!!

تشجعت وغمظت عيوني علشان ماشوف عيون أبوي وقلت يبه وانتي يايمه"أنا أحب ريم وابي أعرس عليها واذا مازوجتوني إياها هبالي بيزيد"إنتهى كلامي وانا لين اللحين مغمض أحتري كف يلف وجهي-ماصار ش(غريبه)وسمعت صوت مدري وشو فتحت عيوني بشوف ليه أبوي مالفني بكف تهقا إقتنع بكلامي(أما عاد ذي) يوم فتحت عيوني لقيت أمي جنبي وادور أبوي والقاوه قاعدن يزحقل الثلاجه الصغيره اللي جنبي يبي يشيلها وينطلها علي وامي قالت له هد هد أعصابك يابوبيزا الكلام أخذ وعطى رد هو وقال أي أخذ وعطى بس ولدتس ذا مدري منهو طالع عليه في خرابيطه ذي قال يحب قال حبتك القراده بلا(أبوي موديل قديم درايش عادي وقير عادي مايعرف الحب) وبدا يهذر علي: أنا أعرست على أمك وانا ماشفتها

(بلاك خايف تشوفك هي وترفضك قبل) والحمد لله جبناكم وعيشتنا زينه والحمدلله رز وجريش وقرصان وفلة حجاج وش أكثر من كذا يبي الرجال(أقوله حب يقولي رز وجريش) المهم يوم شرب عصيره طلع وخذ أمي معه وقال لي إذا طلعت من المستشفى نبي نخطب لك حصيص زين واعقل بس طلعوا ولا جابوا لي خبر طلعوا ولا كنهم قتلوا مشاعر حب صادق مدفون في جسمي النحيل الأشهب طلعوا وطلعت روحي من جسمي(راحت لمشاور وبترجع لاتخافون)معد أدري وش أسوي راح ليلي وانا على السرير مابين مشاهق

ولعب في أزرار السرير التوماتيك(حركه تقل ملاهي صح) وغثيت السستر المسيكينه كل ماجت تشيك علي قصيت لها قصتي وتسنه عاد تدري وش أنا أقول ماغير تهز دميجته وبس!!

قلت لها متى بطلع أنا سستر؟ قلتها بالعنقليزي بعد ولو اللغه تقطر مني قلت لها كذا

"سستر متى أنا بطلع من هنا بلييز؟" شفتوا قلت بليز تكفي لغه!! قالت بعد بكره فيه أنتا روح خلاص قلت إيه جاك الموت يابيزا يعني بتخطب حصيص الخبله أم الجدايل والفرقى في راسها اللي تقل شارع ما زفلت قلت لوعلى رقبتي مانيب معرس على حصيص أنا لازم أنحاش من المستشفى لازم أشوف ريم واقولها باللي أهلي يبون يسوونه فيني يمكن عندها حل لي(هذي مشكلة البزارين إذا تابعوا الأفلام) يوم جت الساعه ثلاث

الفجر من هاك الليله وانا اللي أقحص من سريري وافك المغذي من رجلي

(وش جابه في رجلك؟)

وافتح باب غرفتي المشتركه مع ثلاثين مريض واطلع في السيب خايف أحد يشوفني وابلش وتخرب خطتي!! نزلت للدور الأرضي بس البلا لقيت حارس واقف عند المدخل يعني إنسى أطلع قلت خل ألبس لبس دكتور دايم أشوف كذا في التلفزيون واروح لغرفة الملابس وادخل والا الدنيا ظلمى ماتشوف يدك قلت مو مشكله لبس الدكاتره واحد والبس أقرب شي طالته يدي بعد مافصخت ثيابي!!واطلع للسيب وانا رازن صدري ولو بلبس دكتور ومن زود مانا رازن صدري ماجى في بالي أطالع وش أنا لابس(الثقه مقطعتني حيل) مشيت والا ذيك السستر تمر من عندي وتضحك وتكركر يوم شافتني!! قلت الحمد لله العقل نعمه واطنشها واروح لباب الخروج ويوم شافني الحارس وقفني!! قلت له نعم خير؟ تراني مستعجل عندي عمليه غسيل مخ في مبنى ج ح ط وخر بس!! قال من أنت؟ قلت معك البرفسور زينهم حائزعلى جائزةالصداقه الدوليه(بقول الزماله بس تلخبطت)من جامعة حبيليص للبناء والتلييص وجاي هنا على أساس دعوه تبي شي؟

قال وكذا أنت تلبس دايم يابرفسور زينهم؟ وادنق للبسي واثري عافس الدعوه من قلب لابس مريول سستر واصلن لين نص فخذي وقميصي كان سروال صعيدي يديني داخله في محل الرجلين وراسي طالع من فتحه في النص(من زين الطبايع طلع السروال منشق مع النص)وسماعة الأذن اللي لافها على رقبتي طلعت لي أسود حق السباكه يانا تحفه كنت,وحاولت أزبط الموقف وقلت له إيه كذا أنا متعود ألبس تخصصي غسيل مخ تخبر التنوره القصيره تعطيني حريه في الحركه والسروال لابسه على شكل قميص علشان ماتنتقل الجراثيم مني للمريض وأما اللي الأسود فهو علشان غسيل المخ أشبكه في أقرب حنفيه وادهر تغسيل!!

المسيكين تنحى وقال تفضل تفضل يابرفسور لا أعطلك وطلعت من المستشفى أركض واركب مع أجودي في ددسن

لقيته يدور لاشغل ولامشغله فاضي ومشغل بن سعيد قلت له وصلني بس بدل هالدوران اللي ماله سنع ووصلني عند بيت ريم

وصلت وقعدت أناظر بيتها واشوف غرفتها نورها والع وش مسهرها؟ تذكرت أغنية عبدالحليم حافظ حقت قارئة البياله اللي يقول فيها"فحبيبت قلبك ياوليدي نايمة في قصرن مهجور من يدنو من عند سور بيتهم ومن حاول فك جدايلها مفقودن مفقدون ياوليدي"قلت وش السوات اللحين يابو الزايز؟ أخاف أطب عليهم ويصير زي ماصار أول!!

قلت تصبر ياولد مابقى إلا 3ساعات وتطلع هي لمدرستها وهي آخر فرصه لي معها! وانطق عند درجة بيتهم ألمس الباب واحبب الجدار وش أسوي حبهاذبحني وعلى راي الشاعر وماحب البيوت شغفن قلبي ولكن حب من سكن البيوتا واشرقت الشمس وبدوا الناس يطلعون من جحورهم أقصد بيوتهم وصيح ولعقة ذا يصطر ولده إركب تاخرنا وذيك شايلة ولدها أبو شهرين على كتفها زي العاده تبي تحطه عند أمها أكيد مدرسه ماغير تجمع من الدراهم وغثى بزارينها مايشيله إلا أمها المسيكينه هذاك ولد الجيران جالس يغسل سيارته على هالصبح(ماعنده وظيفه وش يسوي؟)وانا جالس أتامل فيهم إنفتح باب بيت ريم ومن وساعة وجهي ما قمت عن الطريق واثره سواقهم الهندي قام يطالع فيني مستغرب إيس فيه أنتا نفر هنا؟ قلت أقول إلفقها بس ترا والله لا أحط حرتي فيك! متى مدام ريم يطلع بس؟ قال سويه هي فيه يجي(حبيبين ذا السواقين مايقصرون يزودون بالمعلومات) إنتظرت وشوي اقبلت ريم خلف طوايفي

وطوايف من سكن الربع الخالي اقبلت وهي لابسة مريول الدراسة والعباية عليها وسبحان الله ردت فيني

الروح يا زينها هذي وهي توها قايمة من النوم بعد الله يخلف علي تساني شين ليل نهار !! يوم شافتني

واقف عند الباب وقفت في مكانها !! صمت رهيب يا عالم هي عيونها من الله مسبلة وانا عيوني حمر وسواد

حولها ونوم وجوع شي وشيات ما يعلم فيها الا الله قلت لها ري... ما قدرت اكمل اسمها خانتني عيوني

وقمت اصيح وابتسي يوم تسنها حنت علي وقالت وش فيك بيزاا ليش الدموع هذي ؟ قلت يا ريم انا احبس

وابي اتزوجس بس اهلي معيين يبون يزوجوني حصيص ام الجدايل يبون يدفنوني با الحيا قالت بيزاا

ما بيدي شي اسوية لك ؟ وش تبين اجي اخطبك من اهلك يعني ( والله مهيب شينة حركة وانا عاد اتغلى

اذا طلبتي تشوفيني بجي للمجلس لمس وانا شايل العصير وخدودي حمر واحط العصير واروح اركظ لامي

والحيا مقطعني خخخخخخ) قلت يا ريم وش اسوي طيب دبريني قالت وش تبي اكثر اقولك غير اني موافقة

عليك الباقي عليك انت اقنع اهلك انك تتزوجني بدال ام الجدايل حصيص !!

قلت يا ولد خلاص عاد وش تبي اكثر الباقي عليك دبر عمرك البنت موافقة بس شلون اقنع اهلي ؟

وبعد تفكير طويل توصلت لحل مزبوط الا وهو اني اروح لبيت كبير عائلتنا الشيخ مناور ( وين مسلسل

بدوي على ذا الاسم ) وانصاة واستفزع بة انة يقنع ابوي يخليني اتزوج ريم واروح لبيتة وبيتة دايم

زحمة وعالم لانة كبير عائلتنا وكلن يحبة ويحترمة وكلمتة مسموعة وادخل مجلسة خيمة الشعر وما

امداني اويق براسي في خيمة الشعر الا ولدة نويصر مادن لي فنجال قهوة ويصياح تقهو تقهو !!

قلت لعنبو بليسك خلني اسلم على الرجاجيل اول وبعدين قهوني كل ذي ظفارة فيك يعني . يوم مررت

عيوني الزرق على الحظور في المجلس والا يجيلهم حول الستين رجال !! قلت اما بقعد اسلم على كل

واحد فيهم واحببة هين بس والله ما اخلص ولا بعد يومين وادخل واقول بصوت عالي السلام عليكم وانصى

الشيخ مناور وتسن الربع ما جاز لهم سلامي !! يبوني امر عليهم واحد واحد واجغف فيهم هم وريحة

صناقهم وععع اللي توة جاي من سوق الغنم واللي لة شهرين ما سبح وغيرة وغيرة بس سويت اللي براسي

واجغف راس كبير عائلتنا وقلت لة انا يا عم بيزاا ولد فلان الفلاني قال إيه إيه مايحتاج تقول الشبه بين ياوليدي ( يا نصبك بس اما فية شبة بيني وبين ابوي ) قال اجلس جنبي اجلس !!

جلست وانا عيوني طايرة ماني مصدق اللي يصير حسيت اني قاعد امثل مسلسل بدوي اردني على كلامة

وحركاتة !! جلست وقال القهوة قهوو الظيف !!جاك يركظ الخرش نويصر بدلتة ويصب فنجال ويمدة لي

ويوم اخذت الفنجال تذكرت اني صاحب حاجة عند شيخنا وتذكرت المسلسلات البدوية اذا بغو شي من راعي الضيافة حطو فنجالهم قبل لا يشربونة قلت معهم واحط فنجال قهوتي على الارض قبل لا اشرب منة !!

يوم طارت عيون الحظور وقالو " اووووو" وانا تخرعت قلت بس شكلي بنجلد بها المجلس اليوم والتفت

على الشيخ مناور واثرة قاعد يحك وجة بيدة وبعد شوي قال لي " علامك ما تشرب قهوتك " قلت والله

يا عمي لي غرض وحاجة ومحد بيفزع لي فيها غيرك من بعد الله وانا داخل على الله ثم عليك والصدز

اني بغيت ادخل في جدار قبل لا ادخل عليك واحد حدني الله لا يوفقة في الشارع !! قال تقهو تقهو

وطلبك وصلك وانا الشيخ مناور يوم قالها فقيت خشتي كعلامة اني مبسوط وارتشف فنجال القهوة وكل

ما مديتة لنويصر يعني خلاص مابي صب لي يا ابن الحلال يكفي قهوة والي يرحم والديك وقال الشيخ قم

تعال معي للمجلس الثاني وقل وش سالفتك !! رحنا للمجلس الثاني وجلسنا وانا قاعد اقص للشيخ مناور

سالفتي كنت اسمع صوت بنت جنب الباب حق المجلس تقول " مابي مابي وخري عني " حاولت اني ما اسمع

ولو قلت هذي بنتها وعيب اقعد اتسمع لها وشوي الا صوت ثاني تسنة صوت عجيز تقول للبنت " يا بنيتي

مهوب عيب ادخلي علية وكنك ما دريتي خلية يشوفس كودس تعجبينة ويخطبس وش اسوي بس صرت علة علينا

محد جى يخطبس من يوم انولدتي !!" وما دريت الا والبنت طبت علينا في المجلس شكل امها شاتتها بوز

با القوة وتقوم المسيكينة تلقط وجههاوشكل عشرة من ظلوعها تكسرن مع الطيحة وتروح تركظ تبي تطلع

وانا قاعد اتحمدالله على النعمة والعافية لعنبو بليسكم تسذا يعني تبون الناس يخطبون بناتكم ؟

ولا الشيخ مناور على بال امة يوم دخلت بنتة علينا قعد يفرك عيونة بيدية وتسني بة يبيني اخذ

راحتي واقز بنتة كودها تجوز لي واخطبها منة !! بس ولا طرافي بالي ذيك الحزة قلبي مهوب لي ومهوب

معي كان كان مع ريم (اقول الفقها بس ) يوم سمع الشيخ السالفة قال خلاص انا بكلم ابوك الليلة

وما يكون الا كل خير انشاالله يا بيزاا قلت يا مال العافية يا عمي الله يسلمك جيت بطلع وقال لي

الا بيزاا ما شفت شي دخل علينا في المجلس قبل شوي تسني سمعت صوت ( يقصد بنتة اللكيع ) قلت الا

يا عمي هذا شكلها شغالتكم السيرلنكية دخلت بتكنس المجلس ويوم شافتني طلعت ( انواع التحطيم)

يوم طلعت من المجلس الداخلي والقا الربع اللي في الخيمة جاسين يتبارزون بسيوفهم علشان يعرفون

من هو فارس الفرسان فيهم ( سيوف مرة وحدة حدهم نبيطات وتخب بعد )

رجعت للبيت ويوم شافتني الوالدة زغرطت وفرحت قالت طلعت يا بيزاا من المستشفى الحمدلله الحمدلله

قلت اية طلعت وابي اخمد شوي يعني اريح والوقت كان المغرب ويوم جا العشاء ويناديني ابوي !! قال

وش موديك للشيخ مناور يا الهيس الاربد ؟ قلت يا يبة انت ما تبي تشوف ذا الهيس الاربد اللي هو انازي

ما تقول مبسوط في حياتة ؟ قال الا من دون نفس بعد قالها قلت ابي اعرس على ريم هي سعادتي ادري اني

بزر توني بس على الاقل اخطبها اللحين والعرس لاحقين علية واهي فرصة ندرس اخلاق بعض اقصد انا وريم

( الله من زين الاخلاق ) سكت شوي ابوي وامي جالسة تسمع حتسينا وبعد تفكير طويل قال ابوي والله لولا الشيخ مناور كبير عائلتنا تدخل في الموضوع والا تسان ما وافقت!! يوم قال وافقت أمي قامت تزغرط

وانا صرخت واغمى علي من الفرحه وصبو علي كلوركس علشان أصحى ( أهلي عرابجه ) وصحيت وقلت متى يبه متى نخطبها تكفى اللحين؟ قال إثقل بس وخلك رجال باتسر نروح لابوها ونكلمه باتسر المغرب قلت أفف باتسر بعيد ما فيني صبر واقضي الليل كله وانا غاطس في البانيو حقي معبيه صابون واسيد علشان أقتل الجراثيم اللي فيني ولو بكره يوم خطبتي !! ومن باتسر تزينت ولبست أحسن ما عندي ورحت أنا وابوي لبيتهم وضيفونا وكني بريم طايره من الوناسه يوم جيناهم (مسكينه ماخذه مقلب فيك) ومن الربشه والفرحه يوم دخلنا حبيت راس أبو ريم وروس كل اخوانها وشوي واحب يديهم وش أسوي أخاف يعييون علي !!

وجابو لنا القهوه والشاهي واحسن شي جابوه لنا ألا وهو عصير البردقان الطبيعي جابوه في طفريه وفيها 5 كيسان أنا شربت كاسين وابوي ثلاثه (مانوفر شي أبد) وحلاو وسعة صدر وانا قاعد آخذ من ذا الحلا الغالي واحطه في جيبي والله هو أنا كل يوم بشوف حلاو زي كذا؟ وفي خلال الحديث(حلوه خلال ذي صح) قال أبوي والله يابو تركي حنا جايينك في طلب نبي يد بنتك ريم لولدي بيزاا !! إلتفت على أبوي

وقلت يبه أنا أبي ريم كلها مهوب بس يدها وش أزين بيدها لحالها؟ عاد محلاني وانا قاعد أمشي في السوق بعد الزواج وما معي إلا يد ريم بس قاطعينها ومزوجيني إياها عاد يد شلون تتغطى اذا جت تطلع مهيب مشكله ألبسها فردة دسوس!! طيب شلون بجيب عيال؟ دحجني وقال أسكت بس وش يدريك أنت !! رد أبو ريم وقال والله يابو بيزاا نسبكم ينشرا بس لازم أشاور البنت قبل نطيت أنا وقلت هي موافقه تراها!!

ويدحجني أبوي ذيك الدحجه ويضحك لأبو ريم ويقول لايهمك مامن عقل يذكر فيه!! قال أبوي خلاص أجل بننتظر منك خبر وتراها بس خطبه والعرس إنشاالله بعدين على خير قال أبو ريم ما يكون إلا كل خير

ويوم طلعت من المجلس ويوم وقف أبوي مع أبو ريم عند النخله اللي عند المدخل زي العاده شياب وشافو نخل يبي يقعدون يتفلسفون على بعض وانا اللي أنتهز الفرصه وارفع راسي للدريشه اللي فوق لأني داري ومتأكد وجازم إن ريم وامها واخواتها وشغالتهم بعد يطلون علي يبون يشوفون عريس الغفله(عوايد بناتنا في الخطبه أبد ناشبات في الدرايش وانواع القز في العريس! تبي تقهر خطيبتك إذا جيت تخطبها تلطم وانت داخل وانت طالع بعد) وانا اللي أتميلح وارسم إبتسامه على براطمي وقاعد أرفع رجلي فوق مهوب لشي بس أبي ريم تشوف كندرتي الجديده ماشريتها إلا عشانها() ومنا ومنا واترزز ومادريت إلا أبوي شايتني برجله يالله مشينا أنت ووجهك!! صدز هزئني عند حبيبتي بس عادي يمون أبوي ( صرفها بس )

رجعنا للبيت ويوم درت أمي وهي اللي تنبسط قالت تبي تعرس أجل يابيزاا آآه من هالدنيا بس ياوليدي تسنها _البارح يوم أجيبك (وين جبتيني منه؟ بقاله والا مصنع؟) قلت هذا حال الدنيا ياميمتي وراحت ثلاث أيام وانا على نار أنتظر رد أبو ريم وكل شوي سائل أبوي ما إتصل عليك يبه هو؟ واشتري مجلات

الأثاث أدور غرف نوم لي ولعيالنا بعدين وكتلوجات للون الستاير وغيره وغيره وفي اليوم الرابع جاني أبوي ووجهه مسود ومحزن!! قلت وش بك يبه؟ أكيد وحدتن من نخلك ماحملت صح؟ قال لا قلت أجل وش بيخليك تحزن؟ تعال بس يبه وعطني رايك في لون المجلس حقي إذا أعرست على ريم شفني جايب كتلوجات تهبل تعال نتنقى منها!! قال إجلس ياوليدي أبيك بموضوع,وجلست وما تكلم إلا بعد شوي وقال: ياوليدي ترا الزواج قسمه ونصيب(جاب شي جديد على باله) قلت أدري طيب وش السالفه؟ قال اليوم أبو ريم رد علي وقال إنهم مايبونك ياوليدي!!! أنا يوم سمعت ذي الكلمه تنحت شوي ثمن صحيت وجتني دوخه قلت وش قلت يبه ماسمعتك؟ قال ياوليدي لايهمونك والله إنك تسواهم كلهم وألف بنت تتمناك منتب أول واحد ينرفض!! قلت بس ريم موافقه يبه وهي قايلتن لي بلسانها شلون؟

جى أبوي وظمني على صدره لأول مره في حياته

(أفف الريحه دمار بس وش أسوي أبوي ) وقال وهو يبتسي والله ياوليدي إني حاسن بك وادري إنك تحب ريم أنا رجال مثلك وقد حبيت وحده يومني بعمرك وما عطتني وجه وعارف شعورك !! قلت مالي شغل فيك أنت وحبك أول واذا اللي حبيتها أول ما عطتك وجه أنا غير أنا ريم تحبني!! قال وقد بلغ منه البكاء مابلغ(وش جاني قلبت فصحى!)

ياوليدي أم ريم هي اللي معييه تقول إنك ...إنك..إنك شين واذا أعرست على بنتها نسل عائلتهم بيخرب بسبتك لأن عيالك بيكونون زيك شيون!!

حزتها بلعت ريقي وبغيت أغص فيه !! لا لا لا لا قعدت أصارخ مومعقول لا لا أنت تمزح يبه رفضوني علشاني شين مستحيل (هو الرجال ينرفض علشان شكله بعد)!! قال أبوي الشكوى لله ياوليدي شكل أمك يوم تجيبك متوحمه بتيس,عليك أشباه مدري وش تبي !! أنا خلاص تحطمت كل ما فيني إنهد من أعلى راسي إلى رجولي صرت تسني قطعة خرقه ما أقوى أتحرك وما أقوى أتنفس ووجهي حمر ودموعي صارت تهل أربع أربع واللي زاد الطين بله ولد جيراننا كان في سيارته جنب جدارنا ومشغل المسجل وحاط مزعل فرحان كملت أنواع الاحزان !! وافز من حظن أبوي واروح لداخل البيت أركض وهو يناديني بيزاا بيزاا إرجع إرجع ياظنايا ( إيه هين بس )

ومثل الطفل البريء جيت لامي وهي تطبخ واثرها ما درت عن الخبر وشافتني أبتسي وقالت وش بلاك ياوليدي؟

قلت يمه بسألتس سؤال وجاوبيني بصراحه تكفين جوابك راح يغير حياتي أنا شين يمه؟ قالت هوو والله إنك ياوليدي قمر أربعطش لاإله إلا الله حارسن يحرسك بس ... يوم كن الثقة رجعت في نفسي شوي لكن تذكرت مثل علمونا إياوه وحنا بزارين يقول"الشين في عين أمه غزال"

وكملت صياحي ومضت حياتي وانا أندب حظي الشين اللي زي وجهي

......................................The End..........................................

ماكان ودي تكون النهايه كذه بس مو بيدي هو شين وحظه زي وجه وش اسوي انا ......
يالله سلااااااااام وتحياتي للجميع

» كيف تعرف انك في السعوديه؟؟؟<<خطير لايفوتكم
» قنبلة الموسم لايفوووووتكم والله خطير لازم تسمع الكلمات